Nunatta Islandillu akornanni timmisartuussisarnerit matoqqatinneqarnerat sukkanerpaamik Naalakkersuisunit iliuuseqarfigineqarnissaa, Siumut sinnerlugu Inatsisartunut ilaasortap, Lars Poulsenip piumasaraa. Taassuma pineqartoq Inuussutissarsiornermut Aatsitassanullu Ataatsimiititaliami qaqinnialerpaa.
Reykjavikip Kulusuullu akornanni Air Iceland Connectimit isumagineqarluni timmisartuussisarnerit ullumikkut torinngitsumik Naalakkersuisunit suliarineqarput. Tassami Naalakkersuisut siunissamut pilersaaruteqanngillat. Ilisimarpasinngilaallu Kangiani namminersortut inuussutissarsiorlutik ingerlatsimmatattaaq.
– Isumaqarpunga Naalakkersuisut akisussaaffimmik tigusisariaqartut. Sukkanerpaamik takornarianik timmisartuussisarnerit ammaqqinneqarnissaat qulakkeertariaqarpoq. Inuussutissarsiorneq, takornarialerineq nioqqutissanillu pilersorneqarneq tamarmik piaartumik aallarteqqittariaqarput, Lars Poulsen oqarpoq.
– Takornarialerisut, akunnittarfiutillit, namminersortut pisortallu suliffeqarfiutaat tamarmik kalluarneqarput. Tamanna attanneqarsinnaanngilaq. Tamakku piaartumik naammaginartumik aaqqiivigineqarnissaat Naalakkersuisut isumagisariaqarpaat, Lars Poulsen oqarpoq.
Pineqartoq Inuussutissarsiornermut Aatsitassanullu Ataatsimiititaliamut apuunneqarnissaa isumagineqassasoq Lars Poulsenip ilanngullugu oqaatigaa.