Corona ulluni makkunani tuniluuppoq, taamaattumik eqqortunik paasissutissanik toqqammaveqarluta suleqatigiinnissarput pinaveersaartitsinissarpullu pisariaqarluinnarpoq
Aasianni coronamut misissuisarfimmik pilersitsisoqartoq ippassaani Peqqinnissamut Naalakkersuisoq, Kirsten Fencker, tusagassiortunik katersortitsinermi inuiaqatigiinnut oqariartorpoq.
Taamak ilisimatitsineq eqqunngitsoq maanna paasivarput. Pineqartoq tassaavoq pisariaqartitsisoqalissappat, Naalakkersuisut Kommune Qeqertaliullu akornanni suleqatigiissinnaanermik isumaqatigiissusiornissaq siunertarineqartoq.
Corona ulluni makkunani tuniluuppoq, taamaattumik eqqortunik paasissutissanik toqqammaveqarluta suleqatigiinnissarput pinaveersaartitsinissarpullu pisariaqarluinnarpoq, Siumumi politikkikkut siulittaasup tullia, Inatsisartunut ilaasortaq Vivian Motzfeldt isumaqarpoq.
– Naalakkersuisut eqqortumik ilisimatitsisussaanertik pineqartumi ingerlatinngilaat, tamannalu Siumumit ilungersunartutut isigaarput. Nappaat pinaveersaartillugulu peqatigiilluta akiussagutsigu, eqqortumik ilisimatitsisarnissaq pingaaruteqarluinnartuuvoq. Tamatta tatigisariaqarparput, Naalakkersuisut oqariartuutaat eqqortumik isumaliutigineqarluarsimasunillu toqqammaveqarlutik aninneqartut, Vivian Motzfeldt oqarpoq.
-Inuiaqatigiit eqaannerusumik aningaasarsiornikkullu annaasaqaataannginnerusumik ingerlaqqilissappata coronapassit pilertornerusumik kapitissimasunut tunniunneqartariaqarput, maannami takusinnaavarput corinapasimik pissarsiniarneq ulluni amerlavallaarujussuartuni utaqqineqartartoq. Inuiaqatigiit ima amerlatiginngilagut suliassarlu ima ajornartigigunanngilaq utaqqisitsinerup taamak sivisusariaqarneranik kinguneqassalluni, Vivian Motzfeldt oqarpoq.
Aaaqqissuussineq ukiuni marlungajanni coronap takkunnissaannut piareersarsimasoq massakkut tutsuiginassuseqarnersoq ilanngullugu apeqqusersornarpoq. Misissortissimasut akissutisinissaminnut utaqqisarnerat ilaatigullu namminneq tusagaqannginnertik pissutigalugu ujartuillutik akissutisiniartarnerat ilungersunarpoq, tamannalu sukkanerpaamik aaqqinneqassasoq naatsorsuutigaarput.
– Ullumikkut Coronamut tunngatillugu ilungersunartumik inissisimavugut, tuniluuttut aatsaat taamak amerlatigilersimammata. Coronap nunatsinnut takkuteratarsinnaanera allaqqunneqarsinnaajunnaarmat piareersarnerujussuit ingerlanneqarsimasut nalunngilarput, ilaatigut suliassarpassuit pingaarutillit kinguartillugillu illuartinneqarnerannik kinguneqarsimasut. Piareersarsimanerujussuaq ullumikkoqqissaaq iluatsissasoq pisariaqartilluinnarparput, taamaammat Naalakkersuisut tatiginassuseqarlutik paasissutissanillu eqqortunik toqqammaveqarlutik ingerlatsissasut naatsorsuutigaarput. Aatsaat taamak ingerlatsisoqarpat, inuiaqatigiinni toqqissisimaneq pilersinneqarsinnaammat. Massakkut taamak ingerlatsisoqarnera misinnanngilaq, tassami ilisimatitsinerlunneq suliluunniit Naalakkersuisunit naqqinneqanngilaq, Vivian Motzfeldt naggasiivoq.