Malene Geisler Larsenip Kitsissuarsunni nunaqarfinni aqutsisuni ilaasortap Inuit Ataqatigiinniit tunuarluni Siumumut nuunnermini toqqammavilersuutai pisinnaatitaaffiiagaanermik oqariartuuteqartut taperserpagut, nunaqarfinnilu aqutsisutut inissisimatilluni naleqartinneqannginnermik kiserliornermillu misigisimanermik oqariartuutai paasilluarsinnaallutigit
All.: Aqqa Samuelsen. Kommune Qeqertalimmi kommunalbestyrelsimi Siumut gruppiani siulittaasoq
Malene Geisler Larsen Inuit Ataqatigiinniit tunuarluni Siumumut nuuttoq tikilluaqqungaarparput suleqatiginissaanullu isumalluarfigilereerlutigu. Nunaqarfinni aqutsisut oqaloqatigisarneranni paasivarput, nunaqarfinni aqutsisut kommunip allaffiani allaffimmiumut paarlatsitut sulisumiilluunniit pisinnaatitaaffikinnerusartut. Pissutsit taamaannerat akuersaarneqarsinnaanngilaq. Allannguisoqartariaqarpoq, nunaqarfinnilu aqutsisut pisinnaatitaaffiiagaanerat tamaanga killittariaqalerluni. Kommune Qeqertalimmi nunaqarfinni aqutsisut allaffissornikkut sullinneqarnerat siunissami nukittunerusumik inissisimalertariaqarpoq.
Nunaqarfinni aqutsisut peqataatinneqarnerulissappata allaffissornikkut aaqqissuussaanermik qanoq ittumik pisariaqartitsisoqarnersoq nalilersortariaqarpoq. Nunaqarfinni aqutsisut allaffissornikkut sullinneqarnermi pitsanngorsaatissanik namminneerlutik pisariaqartitatik naapertorlugit kommunalbestyrelsimut siunnersuuteqarnissaat pisariaqarluinnarpoq.
Kommune Qeqertalimmi nunaqarfiit tikillugit qinikkatut angalagaangatta nunaqarfinni aqutsisut innuttaasullu allattoqarfimmut, Ataatsimiititalianut ataavartunut aammalu kommunalbestyrelsimut saaffiginnissutaat akissuteqarfigineqartannginnerat akuersaarneqarsinnaanngitsut ilagivaat.
Nunaqarfinni aqutsisut saaffiginnissutaat arlallit Ataatsimiititalianut ataavartunut kommunalbestyrelsimullu ingerlateqqinneqartannginnerat ilungersunartutut nunaqarfinnillu sumiginnaanertut oqaatigisariaqarpoq. Nunaqarfinni Aqutsisut peqatigiiffiat KANUNUPE Kommune Qeqertalimmi nunaqarfinni aqutsisunut atugassarititaasunut pitsaanngitsunut akuersaarneqarsinnaanngitsunullu akuliuttariaqartoq isumaqarpugut.
Kommunalbestyrelsimi sulinitsinni nunaqarfimmiortagut peqataatinneqarnissaat pingaartipparput. Nunaqarfinni aqutsisut peqataatinneqarnerussappata saaffiginnissuterpassuit kommunalbestyrelsimut ataavartumik tulleriiaarinikkut qaqilerneqartariaqarput.
Kommune Qeqertalimmi nunaqarfiit siunissami napaannassappata allattoqarfeqarnikkut politikikkullu ersarinnerusumik tapersersorneqartariaqalerput.