TUSAGASSIUTINUT NALUNAARUT
Nunatsinni nioqqutissat ulluinnarni pisariaqartitat akiisa qaffakkiartuinnarnerat innuttaasut aningaasaqarnerannut sunniuteqarpoq. Iliuuseqartoqanngilarlu. Iliuuseqartoqanngilaq naak siorna KNI A/S-i ataatsimeersuarmat naalakkersuisut siulittaasuannit oqariartorfigineqaraluarlutik nioqqutissat akii appartinniarneqartariaqartut. Uggornarpoq ingerlatseqatigiiffiit nunap siuttuata piumasaqarnera tusaanngittutut immassuk.
Ingammik illoqarfinni minnerni nunaqarfinnilu najugaqartut eqqornerlunneqarnerupput, taakkunani innuttaasut pisiniarfinnut assigiinngitsunut akitigut unammeqatigiiffiusunut akitigullu sanilliussisinnaanermut periarfissaat killeqarmata.
Illoqarfinni anginerusuni pisiniarfiit assigiinngitsut akornanni toqqaasinnaaneq neqeroorutillu iluaqutigisinnaanerat periarfissaavoq, Illoqarfinni minnerni nunaqarfinnilu taamatut periarfissaqannginneq pissutigalugu innuttaasut nioqqutissanik pisariaqarluinnartunik akisunerusumik pisiniartariaqartarput.
Tupigusunnartaqaarlu akinik misissuilluni ilaanni akit ingasalluinnartumik assiginngittuuneri takusarlugit.
Misissuisoqartariaqarpoq, ukiuni kingullerni umiarsuit pajuttaatit ukiuunerani Qeqertarsuup tunuanut uninneq ajungajallutik assartuinermik ingerlatsipput. Taamaammat misissorneqartariaqartunut ilannguttariaqarpoq toqqorsivinnut aningaasartuutit nioqqutissat akiinut qanoq sunniutaat annertutiginersoq.
Najukkani pisiniarfiit ingerlalluarnissaat pingaaruteqarpoq, taamaattorli innuttaasut aningaasaqqarnerat aamma eqqarsaatigisariaqarpoq.
Ukiut kingulliit marluk innuttaasut aningaasartuutaat qiviarneqaratik ingerlasimasut qiviarneqartariaqalerput. Taamaammat Naalakkersuisut kajumissaarpagut politikkikkut siunniussaqartariaqalersut misissuinermillu aallartitseqqullugit Nuna Inuilu pillugit.
Soorlu makkunannga;
- Nioqqutissat ulluinnarni pisariaqartitat akiinik nunatsinni sumiiffinni assigiinngitsuni misissuissasut.
- Nuummi, illoqarfinnilu minnerni nunaqarfinnilu nioqqutissat akiinik sanilliussissasut.
- Assartuinermut aningaasartuutit nioqqutissat akiinut qanoq sunniuteqartarnersut misissorneqassasut.
- Nunaqarfinni illoqarfinnilu minnerusuni pisiniarfiit ingerlanneqarnerannut ulluinnarni akisussaatitaasut atungassarititaasa periarfissaat misissorneqassasut.
- Innuttaasut nioqqutissat akiinut tunngasunik paasissutissanik pissarsisinnaanerisa pitsaanerulersinneqarnissaat.
Isumaqarpugut tamanna niuernerinnakkut aaqqinneqarsinnaanngittoq. Naalakkersuisut akisussaaffimmik tigusillutik killiffik pillugu iliuuseqartariaqalerput. Aaqqiissutissamik siunertaqarluni sukumiisumik piviusorsiortumillu saqqummiisoqartariaqalerpoq.
KNI-p ukiumi naatsorsuusiorfiani 2025/2026 iluanaarutini ukiup siulianut naatsorsuusiorfimmut 2024/2025 sanilliullugit qaffatserujussuarpai. Sinneqartoorneq pivoq pissutsit makkua atukkatta nalaani, Pilersuisoqarfinni nioqqutissat ikililerneqarput, annerusumik nunaqarfini ammasarfiit sivikillineqarput, aasaanerani pisiniarfiit qanga imaqarluarnerpaaffigisartagaanni ilisiviit aattaat taama imaqanngitsigipput. Taamaattorli Pilersuuisup sinneqartoorutai qaffapput. Taava sooq tassunga killittoqarneranik eqqoriagassaq ataasiinnaalerpoq. Nioqqutissat akiisa qaffasippallaarnerat.
Kommuni Qeqertalimmi Siumut
Frantz Lundblad
Qeqertalimmi Siumup siulittaasua
Jess Svane
Siumup Qasigiannguani Siulittaasua