Namminersortunngorsaaneq

Siumup qulakkiissavaa, suliffeqarfiit innuttaasunut iluaqutaallutik ingerlanissaat, namminersortunngorsaanerlu isumannaatsumik inuiaqatigiinnullu nangittumik iluaqutaalluni ingerlanneqarsinnaappat tamanna periarfissaasaaq.

Inuiaqatigiit ingerlanneqarneranni innuttaasut toqqaannarnerusumik peqataallutillu akisussaaqataanissaat siunertaralugu suliffeqarfissuit Namminersorlutik Oqartussanit pigineqartut ilaat namminersortunut ingerlatassanngortinneqarnissaat Siumup siunertaraa, taamaaliorneq inuiaqatigiit kiffartuunneqarnerannut aningaasaqarniarnerannullu isumannaatsumik ingerlatsiviusinnaappat.

Suliffeqarfissuit ilaat nunarput tamakkerlugu sullissiviusut namminersortunngorsarniaannarlugit namminersortunngorsarneqassanngillat, tamatumani inuiaqatigiinni isumagineqartut suliarineqartullu tamatigut isumannaatsuunissaat siunertaajuartariaqarmat.

Namminersorlutik Oqartussat suliffeqarfiutaannik namminersortunut tunisiniarnermi makkua mianerineqartarnissat qulakkeerneqartassaaq: 

• Suliffeqarfissuup pisussaaffii eqqarsaatigalugit innuttaasunut kiffartuussinerup ajorseriannginnissaa.
• Namminersortunngorsaanermi sapinngisamik qulakkeerneqartassaaq innuttaasut piginneqataasarnissaat akisussaaqataasarnissaallu, niuernikkut periutsit nalinginnaasut aallaavigalugit.
• Namminersortunngorsaanermi innuttaasut aningaasarsiornikkut inuussutissarsiornikkullu isumalluutaasa akornusinnginnissaat qulakkeerneqartassaaq.
• Namminersortunngorsaanermut atatillugu qulakkeerneqartassaaq maani nunaqartut salliutinneqarnissaat aamma suliffissaqartinnissaat, minnerunngitsumillu inuiaat kalaallit kulturiannik mianerinninnissaq.
• Namminersortunngorsaanermi nunatta aningaasarsiornikkut unammillersinnaassusia mianeralugu nunanik allanik niueqateqartoqartassaaq.

Siumup anguniarpaa Kalaallit Nunaat namminersorluni inuussutissarsiuteqarnissamut piumassusilinnut periarfissiisoq, inuiaqatigiit ataatsimut siunertarisaat soqutigisaallu aallaavigalugit.