Nalunaaqutaq pillugu Siumup inatsisissatut siunnersuutaa ataatsimiititaliamut ingerlateqqinneqarpoq

Ullumi Siumut Inatsisartuni inatsisissatut siunnersuuteqarpoq, Nunatsinni nalunaaquttap ingerlaqatigiiffia allanngortinneqassasoq aamma aasaanerani nalunaaqutaq atorunnaarsinneqassasoq. Siumup siunnersuutaa siullermik saqqummiunneqarpoq ukioq ataaserpiaq matuma siorna, siunnersuulli nakkarpoq, Inatsisartunut qinersisoqartussanngornera pissutigalugu.

Kalaallit Nunaat UTC -2 naapertorlugu ingerlavoq, Siumullu siunnersuutigaa nalunaaqutaq allanngortinneqassasoq UTC -3-mut, taamaalilluni seqerngup ingerlaarneranut naleqqiullugu pissusissamisut ingerlasoqaqqilissammat.

Siumup ilaatigut tunngavilersuutigaa innuttaasut peqqissusaat eqqarsaatigalugu allannguut iluaqutaassasoq aamma piffissamik nikisitsisarneq timimut artukkiisartoq. Ataatsimut isigalugu siunertarineqarpoq, inuunerput silarsuarput malillugu ingerlaqqilissasoq.

Inatsisissatut siunnersuut siunnersuutigineqartutut atuutsinneqarlissaaq 24. oktober 2026-mi, suliffeqarfiit nunanut allanut attaveqartut ilanngullutik ikaarsaarnissamut piffissaqarluaqqullugit.

Siunnersuut ullumi Inatsisartut ataatsimiinneranni siullermeerneqarpoq aamma ataatsimiititaliamut ingerlateqqinneqarpoq. Siunnersuut uani atuaruk (immikkoortoq 104):

https://ina.gl/gl/ataatsimiinnerit/ataatsimiinnernut-takussutissiaq/2025/em2025/dagsorden/12