Naalakkersuisut paatsoornerarlutik sulisinnaanngillat

Illorsuarmiut ukiut sisamat ingerlaneranni 2 millionit kroninik Folketingiminngaanniit immikkoortitsiviginiarneqaraluarnerat Naalakkersuisunit itigartinneqarpoq, tassagooq suna pineqarnersoq paatsooramikku. Tamanna akuerineqarsinnaanngilluinnarpoq. Taamaattumik Aningaasanut Ataatsimiititaliaq ataatsimiissasoq ullumi kissaatigisimavara

All.: Erik Jensen, Siumumi siulittaasoq Inatsisartunullu ilaasortaq

Danskit naalakkersuisuinut paatsoorsimanerarlutik Naalakkersuisut nassuiaaniarsarinerat qanorluunniit akuerineqarsinnaanngilaq. Tamanna nunatsinni Naalakkersuisut suliaminnik pimoorussinnginneranik – Naalakkersuinikkullu aquummik tigummiartuunissaminnut piareersimannginnerannik ersiutaavoq. Inuit kiffaanngissusiinik periarfissaanillu piiaaffiginiarsarineqassanngillat.

Naalakkersuisoq akisussaasoq, Inuit Ataqatigiinneersoq Naja Nathanielsen, pisoq pillugu avammut nassuiaaniarsarivoq, aningaasat Illorsuarnut atorneqassasoralugit Naalakkersuisut itigartitsisimasut. Nassuiaatigineqartut aammalu utoqqatsissutiginiagaq tupinnartorujussuuvoq; aningaasat sumut atorneqassasorigaluaramikkit? Naalakkersuisut peqatigiiffiit aammalumi innuttaasut qanoq suliniarnerat ilanngullugu aquttussanngoramikku? Naalakkersuisullu sussagamikku, sumiiffinni inuit qanoq peqatigiiffiliorlutik suliniarumanerat? Peqatigiiffiit sulilluarnerat aammalu paasinarluinnartumik suliaqarsimanerat ilumut Naalakkersuisut paatsorsinnaavaat? Taamaattumik Siumumiit isumaqarpugut Naalakkersuisut akisussaaffik tigullugu peqatigiiffiup annaasaanut taarsiisariaqartut.

Aningaasat pineqartut Illorsuarmiut atorfissaqartippaat. Assersuutigalugu Illorsuarmiut inuttut ikorfartorneqarnissaannut aammalu taarsiiffigitissinnaanerannut allarpassuarnullu suliniutinut.

Killormut nunatsinni Naalakkersuisut ikiuiniarsimagaluarnermik oqalunniarnerat tulluanngilaq oqaatigissallugu. Tassami kalerrisaarutiinnarnut suliniuteqaratik aamma nunaqarfimmi illut pigisallu aserfallatsaaliornissaanut assigisaanullu suliniuteqarlutik aallartissinnaagaluarneq Naalakkersuisut tapersinngilaat.

Pisoq Naalakkersuisut paatsoorsimanerinnarmik nassuiaaserniarsaralugu qimarratiginiarsarisaat ikorfartorneqassanngilaq. Taamaattumik Aningaasanut Ataatsimiititaliaq ataatsimiissasoq ullumi kissaatigisimavara, aningaasat Illorsuarmiunut tuttussaagaluit, Naalakkersuisullu sapangissimasaat, akisussaaffeqartumik qanoq iliuuseqarfiginiarneqarnersut Siumumit paaserusukkatsigu.