Allakkat ammasut: Nunarput marlunnik oqaqarluni nunanut allanut tunngasunut politikkeqarnera toqqissisimananngilaq!
Ulluni kingullerni nunatta avammut politikkikkut kiinnertaarnera, pingaartumik apeqqutini illersornissamut sillimaniarnermullu tunngasuni, nunatta siulersorneqarnera pillugu apeqqusersuisitsivoq. Siumut isumaqarpoq ataatsimik oqaqarluni ataatsimoorfiusumillu nunarput nunanut allanut tunngasunut politikkeqartariaqartoq.
Taamaattumik Naalakkersuisut siulittaasuat uani pisumi qisuariartariaqarpoq.
Siumumiit maluginiarparput nunanut allanut nunatta allanngorartumik kiinneqattaalernera, taamaalilluni nunanut allanut tunngasut pillugu politik sammivia naatsorsuutigineqarsinnaajunnarluni. Naalakkersuisooqatigiinni aalajangiisuulluni inissisimasup IA’p folketing-imi ilaasortaatitaa massakkut Naalakkersuisut tusagassiutitigut ammasumik illuatungilerlugit oqaaseqaqattaarpoq.
Ippassaani 7. Juni Nunanut allanut Naalakkersuisoq Partiit siuttuinik nukingernartumik pingaarutilimmillu pinartoqarmat ammasumik aggersaavoq. Tassanilu ilisimati-tsissutiginiarlugu saqqummiuppaa Naalakkersuisut Danskillu Naalakkersuisuisa akornanni silaannaq nillertorujussuusoq. Ippassarli sermitsiaq.ag-mi Naalakkersuisoq oqaaseqarpoq aammalu KNR radiomi Inuiaat tillerneranni saqqummiilluni Danskit naalakkersuisuinik oqaloqateqarneq pitsaasumik ingerlasoq, aammalugooq tusagassiortunngoorukua pisuusut oqaaserineqarsimanngisanik oqartitsiniaanerarlugit.
Tamanna Siumumiiik imaannaanngitsorujussuartut isumaqarfigaarput. Naalakkersuisoq marlunnik oqaqarluni sulisoq tamatta tusaallugulu malinnaavigaarput. Taamaattumik Siumumiik assorujussuaq ernumanartutut isigaarput Naalakkersuisooqatigiit tutsuiginanngittumik sangujoraartumillu ingerlatsinerat. Siumumiillu Naalakkersuisunut tatiginninnerput pilerseqqinneqassappat Nunanut allanut Naalakkersuisoq Naalakkersuisullu siulittaasuat nassuiaateqartariaqarput, suna eqqortuunersoq Inatsisartunut saqqummiuttariaqarmassuk. Partiit siuttuinut paasissutissat apuunneqartut kiisalu tusagassiutitigut oqaatigineqartut imminnut assortuupput, oqariartuutit imminnut assortuuttut tamarmik eqqortuusinnaangillat, arlaannaat ilumoortuusinnaavoq.
Ikinngutinnersumik inuulluaqqusillunga
Erik Jensen
Siulittaasoq, Siumut