Ullumi Inatsisartut aalajangiinerat tunngavigalugu Naalagaaffinngornissamut suliassaq pisortatigoortumik aallartippoq. Nunatta tamakkiisumik aalajangersaasinnaanngornissaa, ilaannakuunngitsumillu demokratiimik atuiffinngornissaa, Siumumut pingaaruteqarluinnartuuvoq.
All.: Kuno Fencker, Inatsisartunut ilaasortaq, Siumut
Ullumi Inatsisartut akuersissutigaat, Namminersorneq pillugu Inatsimmi § 21-p atuutsilersinneqarnissaanut suliaq pisortatigoortumik aallartissasoq. Tamatuma kingunerisaanik Naalakkersuisut ukiamut ataatsimiinnissamut piareersaateqassapput, ilaatigut suliassat tulleriiaarneqarnissaanut oqaasertalersuissallutik.
Naalagaaffinngornissaq Siumumut pingaaruteqarpoq, tamannalu arlalinnik peqquteqarpoq. Nunarput pisuussutinik naammattunik peqarluaannarani aamma issittumi pingaaruteqarluni inissisimavoq. Siumullu pingaartippaa inuiattut kinaassusitta aamma kulturitta nukittorsarneqarnissaat.
Nunarput tamakkiisumik oqartussaaffigissavarput
Siumup 1977-mi partiittut aallarteqqaarnerminiit oqartussaaffiit uatsinnut tunngassuseqartut tamakkiisumik oqartussaaffigilernissaat allanngujuilluni sulissutigisimavai. Nunatta tamakkiisumik aalajangersaasinnaanngornissaa, ilaannakuunngitsumillu demokratiimik atuiffinngornissaa, Siumumut pingaaruteqarluinnartuuvoq. Tamannalu nunarsuarmioqatitsinnut tamakkiisumik appakaanitsigut suleqateqarnitsigullu piguni tamatsinnut iluaqutaanerulluni ingerlanneqarsinnaasoq Siumut isumaqartuarsinnarpoq.
Suliassaq Inatsisartunit tunngavilerneqarsimalluni ukiamut aallartikkuni, suliassarpassuit takkutissapput. Assersuutigalugit taaneqarsinnaapput kikkut Kalaallisut innuttaassuseqarneranik aalajangersagassat (ullumikkut kalaallisut innuttaassuseqartoqanngilaq), Inatsisartunut qinersisarnermut inatsisip naleqqussarneqarnissaa, nunanut allanut attaveqaatit nukittorsarnerunissaat allarpassuillu naalagaaffinngornissamut alloriarfissatut piareersaatissat. Uagut inuiattut illersorneqarnissatsinnut tunngasut ilanngullugit. Kikkut Naalagaaffinngornissamut taasitinneqassanersut aamma qulaajarneqassaaq.
Suleqateqarneq aqqutaassaaq
Nunanik allanik suleqateqarluta tamakkiisumik namminiussuseqarnerput tigugutsigu, Siumup qularutiginngilaa aningaasarsiorneq qaffassarneqassasoq, akunnitsinni nunami attavilersorsimanerput suli pitsanngoriartussasoq, ilinniartitaanikkut periarfissat annertunerusut pilissasut ataatsimullu isigalugu innuttaasuusugut atugarissaarnikkut inissisimalluarnerulissasugut.
Naalagaaffinngornissamut ingerlanerput periarfissiivoq, piorsarsimassutsikkut kingornussat tamakkiisumik atatinnissaanut aammalu oqaaseqarnermik siuarsaanissamut. Periarfissiissapput politikinik nutaanik pilersitsinissamut, namminneq naleqartitaat aallaavigalugit aamma inuiattut uagut ilisarnaatigut aallaavigalugit. Naalagaaffinngornissamut siunnerfeqarneq politikikkut anguniagaannaanngilaq, aammali nutarterinermik ingerlatsineq pisariaqassaaq. Nunatta periarfissaanik qaffassaanissamik aamma Inuit namminneq aalajangiisinnaanerannik annertusaaqataasumik ingerlatsinermik pilersitsissaaq.
____
Aalajangiiffigisassatut siunnersuut uani atuarsinnaavat (immikkoortoq 75 orniguk):
https://ina.gl/gl/ataatsimiinnerit/ataatsimiinnernut-takussutissiaq/2021/fm-2024/dagsorden/20