Muté, toqqoqqajunnaarit!

Siumup aningaasanut inatsisissamut isumaqatiginninniarnermi Aningaasaqarnermut Nunamullu Namminermut Naalakkersuisoq tatigiunnaarpaa. Taamaattumik isumaqatiginninniarnermi Naalakkersuisumik allamik isumaqatiginninniarnerit ingerlanneqalissasut, Naalakkersuisullu siulittaasuat Nunap siuttuatut akisussaaffimmik tigusilluni nuisariaqalersoq, Siumup piumasaraa

Ippassaq kommuninut nakkutilliisoqarfik, Kommuneqarfik Sermersuumi eqqunngitsumik tunngaveqarluni aammalu inatsisinik unioqqutitsisimanerit arlallit aallaavigalugit inissianik attartortitsisarsimaneq, sakkortoorujussuarmik uparuarlugu saqqummiussivoq.

Tamanna tunngavigalugu Siumumiit isumaqarpugut, Aningaasaqarnermut Nunamullu Namminermut Naalakkersuisoq kommunimi pineqartumi borgmesteriunerata nalaani pisut ilungersunartorujussuit akuerineqarsinnaanngitsullu pisimasut uppernarsarneqartullu aallaavigalugit, maanna Naalakkersuisuusoq attuumassuteqarnermigut inissisimanini peqqutigalugit Naalakkersuisumut allamut akisussaaffik tunniuttariaqaraa.

Siumumiit akuerinngilluinnarparput akuerinngisaannassallugulu kammalaatersorluni eqqunngitsumillu ingerlatsisimanerup kinguneqartinneqarani ingerlanniaannarneqarnissaa.

Aningaasaqarnermut Nunamullu Namminermut Naalakkersuisoq, Asii C. Naarup taassumallu partiia, innuttaasunut pissakinnerusunut illersuinerartarpoq. Ullumi ullaap tungaani Inatsisartut ataatsimiittarfianni apeqqarissaarneqarnerani ersersinneqarpoq, pineqartumut tunngatillugu eqqunngitsumik ingerlatsisoqartarsimasoq. Pissaqarnerusut suli aningaasarsiorluarnerunissaat Inuit Ataqatigiit kissaatigisimavaat, taannalu aqqutigalugu kommuni eqqunngitsumik innuttaasut aningaasaatai atorlugit akiitsoqalersillugu, inissianik sanaartortitsisoqartarsimanera sakkortuumik nakkutilliisoqarfimmit uparuarneqarpoq.

Innuttaasut nunatsinni pissakinnerusut, soorlu utoqqaat, sulisartut il.il. tamarluinnarmik aningaasanik pilliuteqartussanngortinneqartarsimapput, naak suleriuseq taanna kommuninut annaasaqaataalluni ingerlatsinerugaluartoq. Tamannalu kimilluunniit illersorneqarsinnaanngitsoq Siumut isumaqarpoq. Taamaattumik Naalakkersuisoq piaarnerpaamik akisussaaffimmik tigusilluni tunuartariaqartoq Siumut isumaqarpoq.

Naalakkersuisut siulittaasuat nunap siuttuatut akisussaaffimmik tigusisariaqarpoq – Pisoq ilungersunartoq innuttaasut aningaasaataanik mangiaaneq pissaqareersullu suli pigissaarnerullutik inissisimanissaannut aqqutissiuussisimaneq  isiginngitsuusaarneqarsinnaanngilaq – massakkorluinnaq Iliuuseqartoqartariaqarpoq.