Inatsisartut torersumik sulinissaraluat aammaarluni innarlerneqarpoq

Siumup Inatsisartuni ilaasortaatitai aatsitassat uranimik akullit pillugit oqallinnermi aqqusinermukanngillat Inatsisartut ilaasortaaffigisat akerliussutsimik takutitsiartorfigalugit. Apeqqut siunissami aningaasatigut ineriartornissatsinnut pingaaruteqartoq asuliinnaq oqaluuserineqassanngitsoq pingaarpoq

All.: Vivian Motzfeldt, Inatsisartunut ilaasortaq

Novembarip 9-ani Inatsisartuni taasinernik amerlanerussuteqartut, Inuiat Ataqatigiit aamma Naleraq aalajangerput, aatsitassat uranimik 100 ppm tikillugu akullit piiarneqassanngitsut, maannalu misissuinissanut akuersissutit akornanni killiliussaq qaangerlugu inissisimasoqarpat, tamanna isumaqassaaq, suliniut piviusunngorsinnaassanngitsoq, apeqqutaatinnagu suliniut taanna avatangiisinut qanoq inissisimanersoq.

Tunngaviusumik ilisimasassanik tunngaveqarani taamaassorinninnermillu tunngaveqarnerulluni Naalakkersuisooqatigiit tunngavilersuuteqaannaratik, aamma Inatsisartunut illuatungiliuttunut oqaatsit imaanaanngitsut Naalakkersuisooqatigiitsitaqartunit aninneqartarput. Oqaatsit tamakku ilagaat ‘piffissaajaatit’, ‘sianilluanngitsut’, ‘akissaajaatsit’ assigisaallu.

Oqaatsit Inatsisartunut aninneqartut tamakku Siumup akuerinngilai. Siumut naaperiaaffissaarutsinniarsaraluni sulinermi peqataasimanngilaq. Killormut apeqqutip aningaasarsiornissatsinnut inuiattullu ingerlaqqinnissatsinnut pingaaruteqarluinnartup oqallisiginerani, naaperiaassutissat arlallit isaattarsimagaluarpai. Apeqqut uteqqiasumik Inatsisartuni qaqinneqaqattaarneqassanngippat torersumik attanneqarsinnaasumillu naammassineqarnissaa Siumup iluunngarluni anguniarsimagaluarpaa.

Ajuusaarnarporlu – naak Inatsisartut amerlanerussuteqaqqajartut aalajangersimagaluaraat –  apeqqut suli erfattutut inissisimammat. Oqaatsit naammattumik tunngavilersorneqarsimanngitsut tunngaviginerullugit apeqqut inernilerallarneqarsimagaluartoq, Siumup attappaa, apeqqut taamak oqallisissianngorlugu Inatsisartuni qaqeqqinneqarnissaa sulissutiginaviannginnatsigu. Siunissami allannguisoqassappat, tamanna inuiaqatigiit ataatsimut aalajangigassarissagaat aalajangiusimavarput.

Inatsisartunut qinersineq kingulleq uranimut aap naaggalu qinersinerunngilaq. Apeqqut taanna Naalakkersuisooqatigiinnit ilanngulluni eqqunngitsumik taamaassorinninneruvoq, tamannalu demokratiimik innarliinertut Siumup nalilerpaa. Inuiaqatigiit isumaqalersinniarneqarput, aatsitassarsiorfiusinnaasutut nalilersuiffigineqartoq ataaseq tunngavigalugu, suut tamarmik periarfissaarutitinneqarnissaanik qinersisoqarsimasoq. Tamannalu soorunami eqqunngilluinnarpoq.