Kommune Qeqertalimmi meeqqanut inuusuttunullu nalunaartussaatitaanermut tunngasut killiffilersuisumik nalunaarusiami (statusrapport) paasissutissaatigineqannginnerat ernumanarpoq isornartoqarlunilu.
Kommuneqarfik Sermersooq aammalu Kommune Kujalleq meeqqanut inuusuttunullu nalunaartussaatitaanermut tunngasut killiffilersuisumik nalunaarusiami (statusrapport) paasissutissaatigimmatikkit nersualaartariaqarput.
Kommunit sinnerini Kommune Qeqertalik ilanngullugu meeqqanut inuusuttunullu nalunaartussaatitaanermut tunngasut killiffilersuisumik nalunaarusiami (statusrapport) paasissutissaatigineqanngimmata ernumanartoqartipparput.
Nunatsinni kommunit tamarmik siunissami qaninnermi meeqqanut inuusuttunullu nalunaartussaatitaanermut tunngasut paasissutissat eqqumaffigilluarnerusariaqarpaat pikkorinneruffigalugillu. Nalunaartussaatitaanermut tunngasut sukumiisumik suliarineqartariaqarput nalunaarsuinerillu pitsaanerusumik ingerlanneqartariaqarlutik.
Meeqqanut inuusuttunullu kinguaassiuutitigut atornerluinerit nunatsinni imaannaanngitsumik oqallisaasareersut ilisimavarput. Meeqqanut inuusuttunullu kinguaassiuutitigut atornerluinerit sumiginnaanerillu pitsaanerusumik iliuuseqarfigineqassappata nalunaartussaatitaanermut tunngasut paasissutissat sukumiisut pigineqartariaqarput.
Kommune Qeqertalimmi nalunaartussaatitaanermut tunngasut paasissutissat amigaatigineqarnerat naammaginngilarput, tamannalu piffissami qanittumi pitsaanerusariaqartoq oqariartuutigerusullutigu.
Kommune Qeqertalimmi Borgmester Ane Hansen qineqqusaarnermi meeqqat inuusuttullu suliniuteqarfigineqartarnerat nukittorsarneqassasoq oqariartuutigereerpaa. Qineqqusaarutit oqaasiinnaanatik timitaqartariaqarput.
Kommune Qeqertalimmi meeqqanut inuusuttunullu nalunaartussaatitaanermut tunngasut killiffilersuisumik nalunaarusiami (statusrapport) paasissutissaatigineqannginnerat pillugu Kommune Qeqertalimmi Borgmesteri Ane Hansen (IA) erseqqinnerusumik nassuiaateqartariaqartoq isumaqarpugut.
Inussiarnersumik inuulluaqqusillunga.
Aqqa Samuelsen
Kommune Qeqertalimmi kommunalbestyrelsemi Siumut gruppiani siulittaasoq.