Kommunit Nakkutilliisoqarfiata nalunaarusiaa il. il. pillugit apeqquteqaat

Doris J. Jensen, Inatsisartunut ilaasortaq

Inatsisartut suleriaasianni  §  37 imm. 1 naapertorlugu Naalakkersuisunut apeqqut imaattoq matumuuna saqqummiuppara:

Naalakkersuisunut apeqqut:

  1. Kommuneqarfik Sermersuup inatsisinik unioqqutitsilluni inissianik attartortitsisarsimanera pillugu nalunaarusiat Kommunit nakkutilliisoqarfiata suliarinikuusai Nunamut namminermut naalakkersuisup, Naalakkersuisoqatiminut ilisimatitsissutitut apuussimanerlugit?
    1. Nalunaarusiat Naalakkersuisunut ilisimatitsissutigineqarsimappata, nalunaarusiat sorliit apuunneqarpat?
    1. Nalunaarusianik Naalakkersuisunut suli apuussisoqarsimanngippat suna tunngaviua? Qaqugulu allakkatigut ilisimatitsinissaq naatsorsuutigineqarpa?
  2. Kommunit Nakkutilliisoqarfianni ilaasortat politikeriunngitsunik taarserneqarnissaat Naalakkersuisunik siunertarineqarpa?
  3. Naalakkersuisut isumaqarpat Kommunit Nakkutilliisoqarfiata Naalakkersuisoqarfiup ataaniinnera pissusissamisoortuusoq?

Tunngavilersuut:

Ulluni kingullerni sammineqartoq tassaavoq Kommuneqarfik Sermersuup inatsisinik unioqqutitsilluni akiviusut tunngaviginagit inatsiserpassuit avaqqullugit attartortitsisarsimanera. Aammattaaq kommunalbestyrelsimi ilaasortat avaqqullugit millionerpassuit atorlugit isumaqatigiissuteqartarsimanerat. Pisut taakkua apeqqutinik arlalinnik pilersitsipput, naalakkersuisullu suliamut tassunga qanoq qisuariarnissaat suli maanna utaqqineqarpoq.

Apeqquteqaatikka pillugit ullut suliffiusut qulit iluanni akineqarnissaat kissaatigaara.