Kommunit

Kommunit namminersortut nukittorsarneqassapput — innuttaasut tamarmik najugaqarfigisaminni oqartussaaqataassapput.

Kommunit namminersortuunerat innarlerneqassanngilaq. Siumup anguniarpaa kommunit aningaasaqarnikkut suliassatigullu namminersortuunerisa ineriartortinnissaat, kommuninik aaqqissuusseqqinnermi pilersaarusiaasimasut isumaqatigiissutillu naapertorlugit.

Kommunit aaqqissuussaanerat ingerlatsinerallu tamanut assigiimmik sinaakkuserneqarsimassaaq.

Kommunerujussuarnik naleqqussaaqqinnissaq innuttaasut amerlanerussuteqartut piumasarippassuk, tamanna Siumup suleqataaffigissavaa. Ilisimavarput Avannaata Kommunia agguloqqinniarluni aalajangersimasoq, Maniitsoq Sisimiullu akunnerminni oqaloqatigiittut aamma Nanortalimmi innuttaasut namminiussuseqarnerullutik ingerlatsilernissaminnik kissaateqartut.

Kommuninut politikimut tunngaviusumik Siumup siunertatut anguniagarai:

• Kommunit aaqqissuuteqqissimanerisa kinguneranik inuit najugaqarfitsik pillugu oqartussaaffiiarneqassanngillat, sumiiffimmilu najugaqartut imminerminut atukkaminnullu oqartussaanerunerat tunngavigalugu kommunit ingerlatsissasut Siumup pingaartippaa.
• Qinikkatut kommunini sulinermi pisinnaatitaaffiit nukittorsarneqarnissaat pisariaqarpoq, aamma ‘kredsmandatip’ isumaa inatsisini ersarissarneqarnissaa qulakkeerneqassaaq.
• Nunatsinni najugaqarfiit naligiimmik ingerlanneqassapput, aamma Kommunit akornanni innuttaasunut assigiinnerusumik atugassaqartinnissaat siunertaralugu kommunit suleqatigiiffissaanik pilersitsisoqarnissaa anguniarneqassaaq.
• Nunatsinni sumiluunniit najugaqaraluarutta pitsaasunik atugaqassaagut.
• Najugaqarfiit tamarmik ineriartortitsinissamut ingerlatseqataasinnaanerat Naalakkersuinikkut qulakkeerneqassaaq.
• Nunatsinni sumiiffiit ineriartortissallugit kajuminnarnerussaaq, najugaqarfigissallugit aningaasarsiornikkullu piorsassallugit. Illoqarfik pingaarneq, illoqarfiit allat immikkoortortallu tamarmik ilisarnaateqarput, nukittuffeqarlutik ineriartornermullu periarfissaqarlutik.
• Kommunini kiffartuussineq, suliffissaqarneq aningaasatigullu atuagassarititaasut naligiinnerunissaat anguniarlugu ineriartortitsineq ingerlanneqassaaq.
• Kommunit ineriartornissaannut suliniuteqarnermi kommunerujussuup aningaasatigut, isumaginninnikkut avatangiisitigullu nammineq napatissinnaanissaa anguniarneqartassaaq.
• Kommunit nukittuffii ineriartornissamullu periarfissai aallaavigalugit ineriartortitsineq ingerlanneqartassaaq.
• Kommunini ineriartortitsinermut suliniutit kommunimi najugarisanilu piginnaasat nukittuffiillu aallaavigalugit ingerlanneqartassapput.
• Kommuninik ineriartortitsineq siuarsarneqartassaaq Namminersorlutik Oqartussat, kommunit, suliffeqarfiit, suliniaqatigiiffiit allallu ataqatigiissaarnerisigut.
• Pisortat ingerlataanni namminersortuni siulersuisulersuisarnermi kommuni sumiiffigisaata inui inissaqartinneqartariaqarput.
• Ineriartornermut arlalippassuartigut Kommunerujussuit akisussaapput, taamaattumik kommunerujussuit suliassat akisussaaffiillu annertuut isumaqatigiissutit tunngavigalugit ingerlateqqissavaat.
• Kommunit pisussaaffigaat nunaqarfinni aqutsisut annertunerpaamik nunaqarfimminnut tunngasunut akisussaaffilissallugit.
• Siumup qulakkeerniarpaa kommunerujussuit imminnut napatissinnaalernissaat, kommunerujussuit immikkuullarissusaat, naleqassusaat nukittuffiillu aallaavigalugit.
• Kommunerujussuarni inuussutissarsiornikkut ineriartortitsinissami tunngaviuvoq uumassusilinnik uumaassuseqanngitsunillu atorluaanerulernissarput. Kommunerujussuit namminneerlutik nunanik allanik suleqateqarnissamut periarfissatik naapertorlugit inuutissarsiornikkut allatigullu ineriartortitsinerminni suleqateqartarnerat killilersorneqassanngilaq.