All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
1. april 2022 aallarnerfigalugu ineqarnermut akiliut 10 %-nik qaffanneqassasoq ulloq 28. oktober 2021 kommunalbestyrelsip ataatsimiinnerani aaliangerneqarpoq, aamma 1. januar 2023 aallarnerfigalugu attartornermut akiliut 3 %-nik qaffanneqartussanngorluni. Inissiat akiinik qaffaaneq taamatut isikkoqartillugu Siumumit tapersersinnaanngilarput.
Kommunip inissiaataanni INI A/S-imiit aqunneqartuni inissiat akiinik Siumumit qaffaarusussimannginnerput erseqqissaatigissavarput, pissakinnerit, akunnattumik isertitallit, utoqqaat, aalisartukkormiut piniartukkormiut aammalu sulisartorpassuarnut ulluinnarni inuuniarnikkut eqquinerluttussamik pinaveersaartitserusussimanerput pissutigalugu.
Inissiat akiinik qaffaaneq taamatut isikkoqartillugu Siumumit itigartinneqarpoq.
Partiit tamarmik paaseqatigiiffigisaannik inissiat akii qaffanngikkaluarlugit siunissamut qulakkeerinninnerusumik, ataqatigiinnerusumik ataavarnerusumillu kommunip inissiaatai iluarsartuunneqartarnissaannik aaqqiissutissamik nassaarniarnissaq pingaartillugu oqaloqatigiinnissaq ineqarneq pillugu isumasoqatigiinneq aqqutigalugu (boligseminari) Siumumit kissaatigineqaraluarpoq. Inissiat aserfallassimanerinik ajornartorsiut piusoq ilisimavarput. Inissiat aserfallassimanerinik ajornartorsiutip aningaasanik pisarialinnik pisariaqartitsiffiussappat aningaasanik nassaarniartoqarnissaanut Siumut piareersimavoq.