Kommune Qeqertalik aatsaat taama innuttakitsigilertoq Naatsorsueqqissaartarfiup kisitsisaataasa takutippaat. Kommune Qeqertalik aallarteqqaarmat innuttaqqortusiartornissaq siunertaasimagaluarpoq.
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Minnerpaamik inuit 83-it allamut nuuppata kommunit kattussuunnerisa kingorna oqaluttuarisaanermi aattaat taama Kommune Qeqertalik innuttakitsigilissaaq innuttaasut 6.000-it ataassimalissammatikkit.
Kommune Qeqertallip 2017-imi aallarteqqaarneraniit ullumikkumut innuttaasut 418-inik ikileriarsimapput. Tamanna 6%-imik appariarneruvoq. Innutaasut ineriartornerat taamatut ingerlaannassappat Kommune Qeqertallip siunissaa eqqarsaatigalugu ajorluinnartumik kinguneqarsinnaavoq. Kommune Qeqertalik innuttakinneruliinnarani akileraarutitigut isertitat annertuut annaaneqassapput. Kommune Qeqertalimmi isumalluutit inuiaqatigiinnilu nukiit ingerlatseqataasussat amigaatigineqalissapput. Innuttakilligaluttuinnarneq Kommune Qeqertalimmi politikikkut iliuuseqarfigineqanngippat pissutsit ilorraap tungaanut aallarnavianngillat.
Kommune Qeqertalik politikikkut aatsaat taama kommunitut ingerlalluartigisutut oqaatiginiarneqartartoq, kisitsilli innuttaasut ineriartornerat qiviaraanni imminnut naapertuutinngilluinnarput.
Kommune Qeqertalik aqutsinikkut nutaaliorfiusoq, allaffissornikkut pisariitsoq, innuttaasunut qanilaartoq peqataatitsillunilu saaffigiuminartoq aamma kalaallit ileqqutsinnut kulturitsinnut inooriaasitsinnullu naleqqussartoq anguniarneqarsimapput, tamarmik nunarsuarmioqataanitsinnut peqataanermik ilisarnaatilimmik ineriartortinneqartussat. Takku tassaapput Kommune Qeqertallip aqunneqarnerani pingaartitat anguniakkallu.
Kommune Qeqertalimmi qanoq ajortoqarmat innuttaasut allamut nutsertut? Aamma sooq innuttaasut Kommune Qeqertalik nuuffigissallugu kajungerinngilaat?