Erik Jensen
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
- Kangerlussuarmi mittarfiup iluarsaanneqarnissaanut missingersuusiornissamut piffissamullu pilersaarusiornissaq (byggeprogram) Mittarfeqarfinniit qanga aallartinneqarpa?
- Pilersaarusiorneq qanittumi aatsaat aallartinneqarsimappat, sooq taamak kingusitsigisumik aallartinneqarpa? Tassami illersornissaqarfik Naalakkersuisullu Kangerlussuup mittarfiata atuinnarnissaanik tunngavisumik 18. september 2019-imili isumaqatigiissuteqarnikuupput.
- Pilersaarusiorneq qanoq akeqarnissaa ilanngullugu qaqugu naammassissava?
- Pissusissamisoornerussanngila Kangerlussuarmi mittarfiup iluarsaanneqarnissaa Naalagaaffiup/illersornissaqarfiup akilertussaammagu, Mittarfeqarfinniit pilersaarusiorfigineqarani Naalagaaffimmiit nammineq pilersaarusiorfigineqaruni?
- Naatsorsuinerit suminngaanneersut kikkunniillu suliarineqartut tunngavigalugit Kangerlussuarmi mittarfiup atuinnarneqassappat 800 mio. kr. aningaasartuutigineqartussatut missingiunneqarpat?
- Kiap aningaasartuutissatut missiliuut suliaraa.
- Sakkutuunngorniarnissamut taarsiullugu upalungaarsimanermut tunnganerusunik ilinniartitaanissat Naalakkersuisut kissaatigineqarnerummata, taava upalungaarsimanermut ilinniartitaanerit pilersaarusiorfigineqarpat?
- Taamaassimappallu qaqugu aallartinneqarnissaat Naalakkersuisut ilisimatitsissutigisinnaavaat?
- Videumi 17. juni 2021-imi avammut saqqummiunneqartumi minuttit 10:34 aamma 11:03 akornanni isiginnaarneqarsinnaasumi Nunanut Allanut Naalakkersuisumit Kangerlussuarmi illersornissamut ilinniartitaanermut atatillugu oqaatigineqartutut, tamatuma “inunnik toqoraanissamik ilinniartitsineruneranik” oqaatigineqartut ilumoornersut Naalakkersuisut uppernarsarsinnaavaat: (Video naqqani takuuk)
- Naalakkersuisut uppernarsarsinnaavaat Kangerlussuarmi “inunnik toqoraanissamik ilinniartitsinnissaq” Naalakkersuisuusimasut siuliisa siunertarisimagaat aammalu danskit ministeriinut isumaqatigiissutigisimagaat?
- Aap b) Naamik
Tunngavilersuut:
Inatsisartut suleriaasiat §37 atorlugu apeqquteqaatinni Naalakkersuisut akissutaat: 2021 -062 aallaavigalugit maanna apeqquteqaqqinnissannut pissusissaqarlersippaannga.
Tassanimi akissuteqaatigineqartumi apeqqut 3 imatut Naalakkersuisut akissuteqarput “Tamatuma kingorna Mittarfeqarfiit sanaartornermut pilersaarummik, pilersaarusiornermut, tassungalu missingersuusiornissamut piffissamullu pilersaarusiornissamut tunngaveqarsinnaasumik suliaqarlutik aallartipput” Tassa imatut aamma paasineqarsinnaalluni, suliaq aatsaat qanittumi aallartittoq, naak september 2019-imili isumaqatigiissut tunngavilerneqareeraluartoq. Taamaattumik tamatumunnga suna aammalu kikkut suliamik kinguarsaasimanersut paaserusunnarsilluni.
Tamatuma saniatigut videumi ulloq 17. juni 2021-meersumi oqaaseqaatit Nunanut Allanut Naalakkersuisumit saqqummiunneqartut Naalakkersuisunit uppernarsarneqarlutilluunniit ilumuunnginnerarneqarnissaat kissaatiginarpoq.
Kissaatigaara apeqquteqaatikka ullut suliffiusut qulit qaangiutinnagit akineqassasut.