Kalaallit Nunaata imminut napatissinnaanerulernissaanut aqqut tassaavoq naleqarnerulersitsineq

Kalaallit Nunaat periarfissarpassuaqarpoq. Pinngortitami pisuussutinik annertuunik peqarpugut,
aalisarnermik inuussutissarsiuteqarpugut nukittuumik, takornariaqarnermi, nukissiornermi,
imermik pisuussutini kiisalu inuussutissarsiutinik nutaanik ineriartortitsinissamut periarfissat
annertusiartorput. Kisianni aningaasaqarnitta nukittorsarnissaa aammalu imminut
napatissinnaanerulernerup tunngavissinneqarnissaa kissaatigigutsigu, inuiaqatigiinni tamani
atugarissaarnermik pilersitsisartumik pingaarnerpaamik ukkatarinnittariaqarpugut: inuit aammalu
naleqarnerulersitsineq.

Aningaasarsiornermut tunngasumik oqallinneq amerlavallaatigut pisuussutit isertitallu pillugit
apeqqutinut killilerneqartarpoq. Kisianni pisuussutit namminneq naleqanngillat. Naleqalersitsineq
aatsaat pilersarpoq inuit periarfissat sulinermut, tunisassiornermut, nutaaliornermut
inuussutissarsiutinillu ineriartortitsinermut atoraangamikkit.

Taamaattumik Kalaallit Nunaata pisuussutai pingaarnerpaat tassaanngillat imaani aalisakkat,
nunap iluani aatsitassat imaluunniit pinngortitami periarfissat. Pisuussutigut pingaarnerpaat
tassaapput innuttaasut.

Aalisartoq tassaavoq immap pisuussutaanik naleqalersitsisoq.

Sanasoq tassaavoq inuiaqatigiinnik sanaartortoq ineriartortitsisorlu.

Ilinniartitsisoq meeqqerivimmilu perorsaasoq tassaapput kinguaariinnik siunissamut
ineriartortitsisartoq.

Inuussutissarsiortut tassaapput aningaasaliisartut, suliffinnik pilersitsisartut ineriartortitsinermillu
siuarsaasut.

Kalaallit Nunaat nukittunerusoq kissaatigigutsigu, sulinermut, ilinniagaqarnermut,
namminersorluni aallartitsinermut inuussutissarsiutinillu ineriartortitsinermut pitsaanerusunik
sinaakkusiisariaqarpugut.

Peqatigisaanik eqqumaffigisariaqarparput nammineq pisuussutitsinnit naleqarnerulersitsineq
annertooq suli Kalaallit Nunaata avataani pisarmat. Aalisakkat aammalu nioqqutissiat allat
amerlanertigut suliarineqanngikkaluarlutik avammut tunineqartarput, naak suliarineqarnissaat
suliffinnik isertitanillu amerlanerusunik pilersitsisinnaagaluartoq. Tamanna isumaqarpoq
naleqarnerulersitsinerup annertoorujussua nunani allani pisartoq.

Tamanna allanngortittariaqarparput.

Suliat naleqarnerulersitsisut aammalu tunisassiorneq annertunerusumik Kalaallit Nunaanni
pisarnissaat siunertaralugu aalajangersimasumik sulissutigisariaqarparput. Tamanna
minnerunngitsumik aalisarnermut atuuppoq, kisianni aamma takornariaqarnermut,
mingutsitsinngitsumik nukissiornermut, imermik pisuussutinut kiisalu kulturimut tunngasunik
inuussutissarsiutinut atuulluni.

Tamatuma saniatigut siuariartorneq aningaasaliinerillu akornusersorneqartarnerinik
nassaarniarluta piiaaniarlutalu sapiissuseqartariaqarpugut. Inuussutissarsiutinik
ineriartortitsinermi unammilligassat annersaasa ilaat Kalaallit Nunaata avataaniinngillat, kisianni
nammineq inatsisiliornikkut allaffissornikkullu pilersissimasatsinnik sinaakkutinut
aaqqissuussaanernullu attuumassuteqarput.

Inuussutissarsiortut nukittunerusut tapersiissutinut aaqqissuussinernik taamaallaat
pilersinneqarsinnaanngillat. Aalajaatsumik orniginartumillu sinaakkusiinikkut pilersinneqartarput,
taamaalilluni aningaasaliisoqarsinnaavoq, suliffeqarfiit ineriartortinneqarsinnaapput suliffiillu
pilersinneqarsinnaallutik.

Kalaallit Nunaata siunissaa pillugu oqallinneq aamma Naalagaaffinngornissamut tunngaveqarpoq.
Kisianni aningaasaqarnikkut politikkikkullu imminut napatissinnaaneq aalajangiinikkut taamaallaat
pilersinneqarsinnaanngilaq. Sanarfineqartariaqarpoq.

Kalaallit Nunaat imminut napatinnerusoq anguneqassappat amerlanerit sulilernissaat, amerlanerit
suliffeqarfinnik pilersitsinissaat aammalu amerlanerit inuiaqatigiinni ataatsimut
naleqalersitsinerunermut peqataalernissaat pisariaqartuuvoq. Taamaattumik
pingaaruteqarluinnarpoq politikkimik ingerlatsissagutta nammineerluni suliniuteqarnermut,
akisussaassuseqarnermut inuussutissarsiutinillu ingerlatsinermut tapersiissasugut.

Kalaallit Nunaat periarfissaqarpoq.

Kisianni periarfissat namminneq ineriartortitsinermik pilersitsisanngillat.

Ineriartortitsineq pilersarpoq periarfissat iliuuseqarfiginerisigut, suliffinnut siuariartornermullu
atorneqaraangata.

Taamaattumik imminut napatissinnaanerulernerup aqqutaa pisuussutitigut taamaallaat
ingerlasuunngilaq. Inuit Kalaallit Nunaanni inuiaqatigiinni ullut tamaasa naleqalersitsisut
aqqutigalugit ingerlasuuvoq.