Inatsisartut Siulittaasuata Inatsisartunik nipangersaaniarnera akuerineqarsinnaanngilaq
Ulloq 30. Juni 2026 Inatsisartut siulittaasuata Inatsisartut nittartagaatigut saqqummersitaani atuarneqarsinnaavoq Inatsisartut siulittaasuata illuatungiliuttunut sakkortoorujussuarmik upissussilluni saqqummersitsinera. Tamannalu Siumumiit akuerinngilluinnarparput aammalu taamatut iliortoqarnera Inatsisartuni atuuffimminik immikkoortitsisinnaannginneranik ersersitsisuusutut nalilerneqarsinnaalluni.
Inatsisartut Siulittaasuat Inatsisartunit qinigaavoq Inatsisartut aqutsisuussalluni Inatsisartullu sulinerannik siuarsaasussaalluni. Atuuffimmi tassani nalinginnaasumik ataatsimiinnerit immikkoortitsiviunngitsumik aqussallugit, Inatsisartut tamakkerlugit, tassalu naalakkersuisooqatigiit aamma illuatungiliuttut sinnerlugit sinniisuussalluni, pissaanerullu pingasoqiusamik agguloqqanera, tassa Inatsisartoqarneq Naalakkersuisoqarneq kiisalu eqqartuussuveqarneq/politeeqarnerlu immikkoorluinnarnerat ilisimaaralugulu illersussallugu. Taamaattumik Inatsisartuni siulittaasup pisortatigoortumik oqaaseqarnerani maannakkut Naalakkersuinikkut ingerlatsinermut akulerunneruvoq, illuatungiliuttunillu nipangersaanerulluni.
Tusagassiuutinut nalunaarut Inatsisartut sulinerannut imaluunniit inatsisartut ingerlatsinerannut ataatsimilluunniit tunnganngilaq. Akerlianik tusagassiutitigut nalunaarummi tunngavilersorneqarpoq sooq Naalakkersuisooqatigiit pilersinneqartarnersut. Allatut oqaatigalugu; “qinersinermi neriorsuutitik tamakkerlugit naammassisinnaanngimmatikkit uparuartussanngikkigut” aamma “isumaqatigiissuteqartariaqartarmata, illuatungiliuttunit isornartorsiorneqartassanngitsut” kiisalu “innuttaasullu tamanna paasinnissinnaasariaqaraat”.
Oqaaseqatigiit taamaattut nalinginnaasumik Naalakkersuisut imaluunniit Naalakkersuisooqatigiit saqqummiuttarpaat, Inatsisartut siulittaasuataanngitsoq.
Inatsisartut Siulittaasuata pisortatigoortumik avammut nalunaarutaa Naalakkersuisut attaveqaqatigiinnermik akisussaaffiannut tunnganerusoq Siumut isumaqarpoq. Tassami Naalakkersuisooqatigiinnermi isumaqatigiissutit nassuiarnissaat, isumaqatigiissutit tunngavigalugit naaperiaasimaneruppataluunniit nassuiarnissaat, aningaasaqarnikkut pingaarnersiuinerit tunngavilersornissaat, Naalakkersuisunut tunngasumik politikkip illersornissaa, qinersinermi neriorsuutit pillugit isornartorsiutit akissuteqarfiginissaat Naalakkersuisut akisussaaffigivaat.
Taamaattumik Siumup Inatsisartut Siulittaasuata illuatungiliuttunut Siumumullu nipangersaaniarnera aammalu piviusumik uppernarsaatissalimmillu toqqammaveqarluni sulinermini uparuaanerinik Inatsisartut siulittaasuata naleerutsitsiniaanera akuerinngilluinnarpaa.
Siumup kissaatigaa Inatsisartut siulittaasuat tassaassasoq arlaannaanulluunniit attuumassuteqarani Inatsisartuni ilaasortanut tamanut proffessionaliusumik sullissisoq, inatsisartuutitat kissaataannik suliakiussaannillu naalaarsinnaassuseqarlunilu sullisserusuttorlu.