Qaqortumi inuppassuit Arctic Umiaq Linep qimarratigai. Tamanna pivoq umiarsuarmi sulisut marluk coronamik eqqorneqarmata. Pisortalli pigisaat taamak pissusilersortussaanngilaq, piginnittullu, Naalakkersuisut, aaqqiissuteqarlutik kigaappallaarujussuarlutik iliuuseqarniarsimapput. Inuit qimarratigineqarneq ajorput
All.: Anders Olsen, Inatsisartunut ilaasortaq
Kujallermi angallannikkut piffissami kingullermi annertuumik eqqugaanerluttoqarpoq. Tamanna pilerpoq Arctic Umiaq Line ilaassuni Qaqortumi nioriarlugit, ikisoqaqquseqqinngeriarlunilu, ilaasoqarani utimut Nuummut ingerlaarmat. Tamanna pivoq tallimanngornermi januaarip 7-iani, pissutaasorlu tassaavoq sulisut marluk coronamik eqqugaasimammata.
Ilaasussarpassuit apuuffissaminnut tikissinnaajunnaartut tamaangaannarlu inissinneqartut pineqarput; atorfillit, sulisartut, meeqqat, utoqqaat ilinniartullu. Eqqumiiginartualu unaavoq, ilaasussaagaluit apuuffissaminnut ornigussinnaajunnaartut asuli Arctic Umiaq Linep qimarratigigamigit, Naalakkersuisullu kingusissorujussuakkut aatsaat eqiimisaartutut pissusilersulermata.
Pisortat ingerlataanni Naalakkersuisut akisussaanerpaallutik inissisimapput, pisumullu ikiuukkasuarlutik iliuuseqarnissaat ingerlaannaq pisussaavoq, tamannalu suliffeqarfiup nammineq ilanngullugu ilisimasimassagaluarpaa. Eqqorneqartut iliuusissaarutitillugit nalornisinneqarnerat akuersaarneqarsinnaanngilaq.
Naalakkersuisut susassaqanngitsutut piffissami sivisuummi, ilami ullorpassuarni, pissusilersorsimanerat akuersaarneqarsinnaanngilaq. Inuit pisuussutiginngisaminnik eqqugaasut qimarratigineqarneq ajorput! Pingaartumik kiffartuussisut uagut pilluta sullissisussaagaluit pineqartillugit, Naalakkersuisullu piginnittutut akisussaatillugit eqqummaarinneralutillu sullissilernissaat pisariaqavitsillugu.