Ukioq ataasinngulerpoq kommunalbestyrelsimi ilaasortanngorama, qinigaarlaajullunga. Iserfik tujorminarluinnartoq maanna takusimalerpara. Oqartariaqarpunga ernumaammerlunga
All.: Dorthe-Marie Mogensen-Fontain, Sermersuummi kommunalbestyrelsimi ilaasortaq
Inuiaqatigiit aningaasaataannik atorfilittat atornerluisut ataasiinnaanngitsut maannamut suliani takusimalerpagut. Sulinissatsinnut ajortisaarilluinnartut.
Sermitsiaq.AG-mi qanittukkut saqqummiunneqartumi atuarneqarsinnaavoq pisortaasoq isimigut suliaritikkiartornissaanut innuttaasut akileraarutaannik 22.000 kroninik akiliunneqarsimasoq. Immikkoortitsinertut taaneqartariaqartariaqarpoq. Atorfilittat innuttaasullu aamma ornigullutik suliaritinnissamut neqeroorfigineqarsinnaappat, Naagga, taamaattoqarunnanngilaq. Kiisa qularnarunnaariartorpoq Kommunip allattoqarfiani ingerlanerliortoqartoq ilami taannaannaasimanavianngitsoq, immikkut pineqarsimasoq.
Illuatungiliuttutut inisissimasugut kommunalbestyrelsimi sulinermi ajortisaarisutut suaarutigineqarpugut. Massakkullu takusinnaallugu allanik aamma pisoqarsimasoq uparuarutsigu aamma ajorineqassaagut? Isumaqarpugut allaffissornikkut akisussaanerpaaq akisariaqartoq sooq torersaaneraqisutut imminnut nittarsaattoq, kiammiuku tukassagai? Kiaaku akisussaaffii? Apeqqutini akineqarsinnaasoq tassaaginnarpoq allaffissornikkut akisussaanerpaasoq tassaasoq borgmesteri.
Inatsisilli toqqammavigalugit ingerlatsisoqarnissaanik piumasaqarnerput uagutsinnut tutsinneqaannartaraaq, ajortisaarisutut inissilluta. Maannali saqqummerartut takutippaat kommunalbestyrelsimi sulinissatsinnut ajortisaarisut sumiinnersut. Qinigaaffimmi siullermiilli kiisa misiginarsivoq allamik suliaqarnata, torersaaneq. Akisussaanerpaaq akisussaaffini nalunngittussaagalarpaa. Ingerlatsivinni naamminerisamini qaninnerpaanut ilaanut malinnaassimannginnerpoq, imaluunniit pissutsit apeqqusinngiivillugit ingerlaannarpa?
Sakkortuumik uparuassavarput, una pisoq akuersaarneqarsinnaanngilluinnarmat. Aammalumi pisut ivertinneqarnitsinniit pisimasut akuersaarneqarsinnaanngilluinnarmata.
Inissianut tunngatillugu attartortarneq attartortitseqqiisarnerlu inatsisit unioqqutillugit ingerlatsisimaneq aamma isummerfigineqarusunnani itisilerneqarusunngilaq sualummik akisussaaffimmik tigusisoqarusunnani. Borgmesteri tassuunga tunngatillugu takutittariaqarpaa aqutsisinnaalluni, qununani nassuerutigissallugu kukkusimanini pillugu, soorlu taamani akiuussuserneqarnissamut tunuleriaanik qaangeraammat taamak iliortoq. Imaluunniit 20 million kr iserit a/s-imut atukkiussat aningaasaqarnermut ataatsimiisitaliamit oqaluuserineqarsimanngitsoq Borgmesterip atsiorsimammagu utoqqatsertoq. Atorfilittanillu pisuutitsiinnaqqissanerpa? Maannakkut aamma atorfilittanik politiinut unnerluussisava?
Aqutsineq torinngippallaaleqaaq, innuttaasut sullisissallugit sassarnikuuvugut, maannali kommuneqarfik sermersuumi pisunik nakkutilliisussatut nukippassuit atuleqqavagut tassalimi aqutsineq ajorluinnartoq ingerlanneqarmat. Oqartarnerattullu NAAMMALEQAAQ.