All.: Vivian Motzfeldt, siulittaasup tullia, Inatsisartunut ilaasortaq
Nassuerutigissavara decembarip ulluisa 30-ani Naalakkersuisut peqqussutit nutarterneqalerfianni partiit siuttuinik ataatsimeeqateqarmata, ersareqqissaartumik januaarimi nunatsinni immikkorluinnaq iliuuseqartariaqarnerput tamaviaarutigisimagaluarakku. Nunarput nunanut allanut assersuukkuminaammat, angallannikkullu pissutsit ilungersunartaqisut suli januaarimi ilungersunarnerullutik inissisimasarnerat inuppassuillu peqqinnissaqarfinnut orniguteriaannaannginnerat tunngavilersuutigalugit, tamannali ajoraluartumik Naalakkersuisuutitaqartunit tusaajumaneqanngilaq.
Killiffik inuppassuarnik erloqisitsivoq, nalinginnaasumik suliniarneq, ilinniarneq atuarnerlu ingerlatissallugit ajornakusoorput. Maanna inuppassuit Coronamik tunillanneqarsimalerput. Assorsuaq ajuusaarutigaarput meerannguit suliluunniit akiuussuserneqarnissaanut killinnata, suut tamarmik sapanginneqalersutut isikkoqaleriartornerat akuersaaruminaatsikkatsigu.
Meeqqat immikkut iliuuseqarfigineqassasut kissaatigaarput
Meerartavut illersugassaraagut, ulloq manna tikillugu meeqqat suli akiuussuserneqarnissaminnut periarfissinneqarsimanngitsut immikkut iliuuseqarfigineqanngillat, angajoqqaarpassuit isorliunerusunilu najugaqartut ernumassuteqartut paasilluarpavut, soorlu aamma taamak pisoqaqqunagu juullinngilaarnerani ernumassutivut tusagassiuutinut nalunaaruteqarnitsigut oqariartuuteqarfigisimagipput. Manna ajuusaarnaraluartumik ernumassutivut piviusunngortut takusinnaalerpavut. Naammanngilaq inuiaqatigiit oqaatsit kusanartut qulequtaannaasulli atorlugit oqariartorneq ersarissumik oqaatsit tusaruminarsakkat qanoq iliornitsigut qanorlu ikioqatigiinnitsigut pinngitsoortissagivut periusissiorfigisimatinnagit.
Nalunngilarput maani nunatsinni peqqinnissaqarfiit nammassinnaasaat pisinnaasaallu killilimmik inissisimasut, taamaammat paasisinnaanngilluinnarparput taamak inissisimasut immikkut illersorumallugit sukannernerusunik periusissianik saqqummiussisoqanngimmat.
Akerlianik killiffik Naalakkersuisut sapangittutut ippaat, innuttaasullu namminneq akisussaaffimmik ingerlatsinissaannik oqariartorfigalugit, taamak oqariartorneq soorunami ajunngilaq tamattami akisussaaffimmik tiguseqataasussaavugut, isumaqarpugullu aamma ulloq manna tikillugu innuttaasut pitsaasumik akisussaassusilimmillu kivitseqataasimasut. Tamannali immineq naammanngilaq, innuttaasut pisariaqartippaat Naalakkersuinikkut nalorninaatsumik, ataqatigiissumik paatsuungananngitsumillu ingerlatsinissaq pilersaaruteqarnissarlu, ajoraluartumilli taamaattoqarnera takujuminaappoq, tamannalu toqqissisimannginnermik pilersitsivoq.
Inuiaqatigiinni tuniluunneq januaarimi sakkortunerpaassasoq naatsorsuutigineqareerpoq, tamakkorpiaallu tunngavigalugit aaqqissugaanerusumik uagutsinnullu pitsaanerusussaq ujartorlugu Naalakkersuisut siunnerfiliisariaqarput, taakkuuppummi paasissutissanik qaninnerpaamik pilersorneqartut. Partiilersorfiunngitsumik ikioqatigiinnerunissaq aqqutissiorneqartariaqarpoq – imaanngitsoq partiit siuttui aaliangeriikkanik allanngortitassaajunnaareersunik tunuliaqutsiiginnartussatut atorneqassasugut.
Nualluut nunarsuarmi tuniluuttoq nunatsinnilumi tuniluullualereersoq parteeqanngilaq, taamaammat qanortoq isummat katersorneqarlik naaperiaasinnaassuseqarneq tusarnaarsinnaanerlu inissaqartillugit, qanortoq inuiaqatigiit sapinngisamik toqqissisimasumik atugaqarnissaat salliutinneqarli, naalakkersuinikkut anneruniarneq pinagu!
Naammaleqaaq – suut tamarmik sapanginneqalersutut isikkoqaleriartornerat Siumumit akuersaaruminaatsipparput.