Allattoq: Siumut Folketingip allattoqarfia
Siumup Folketingimi ilaasortaatitaa Aki-Matilda Høegh-Dam ataatsimiinnernut assigiinngitsunut arlalinnut sapaatip akunnerani matumani peqataavoq.
Inatsiartut Inatsisinut Ataatsimiititaliaata Folketingimi Retsudvalgimik Kalaallit Nunaat pillugu ataatsimiititaliamilu ataatsimeeqateqarnerani peqataavoq. Inatsisartuni ilaasortat Mala Høy Kukó (S), Aqqalu Jerimiassen (A) aamma Asii Chemnitz Narup (IA) ataatsimiinnermi peqataapput, Folketingimilu ilaasortanut piumasaqarlutik. Kalaallit Nunaanni isertitsivinni sulisut, eqqartuussivimmi sulisut, politiit kommunefogedimilu sulisut aningaasarsiatigut nalimmassarneqarnissaat kissaatigaat. Inatsisartuni ilaasorta aamma piumasaraat eqqartuussivinni digitalisererneqarnissaat aamma piumasarineqarpoq.
”Qinigaaffiup siuliani aallartisakkatta Inatsisartunit tapersersorluarneqarnerat nuannaarutigaara”, Aki-Matilda Høegh-Dam ataatsimeereernermi oqarpoq.
Politiforbundip siulittaasua Heino Kegel pingasunngormat ataatsimeeqatigaa, tassani Kalaallit Nunaanni politiit aningaasarsiaasa amerlineqarnissaannut suliniutip anguneqarnissaanut ajornartorsiutit eqqartorneqarput.
Aki-Matilda Høegh-Dam aamma isumaqatiginninniarnernut arlaleriarluni sapaatip akunnerata ingerlanerani peqataavoq.
Folketingip Kalaallit Nunaat pillugu ataatsimiititaliaa ataatsimiippoq. Nunat inoqqaariiit pillugit nalunaarusiortartoq FN-imeersoq Francisco Calí Tzay ataatsimeeqatigineqarpoq. Inuit pisinnaatitaaffii eqquutsinneqarnersut pillugit paasisassarsioriarluni Københavnimiippoq. Suliamut tunngassuteqartumut attuumassuteqartunik Tzay ataatsimeeqateqaqattaarpoq, tassani ministeriaqarfinnut oqartussaqarfinnullu aamma ataatsimeeqateqarluni.
Kalaallit Nunaat pillugu ataatsimiititaliami ataatsimeereernermi kingorna Aki-Matida Høegh-Dam allamut ataatsimiikkiarpoq.
Naligiissitaanermut digitaliseringimullu ministeri, Venstremeersoq Marie Bjerre ataatsimeeqatigaa.
Ataatsimiinnerpassuit saniatigut Christiansborgimi allanik aamma pisorpassuaqarpoq. Inuusuttuaqqat Folketingimi ataatsimiinneranni Kalaallit Nunaannit peqataasut, Naja aamma Malika, Siumup Folketingimi pulaarput.
Siumup allattoqarfia ilasseqatigiinnermut aamma qaaqqusaavoq. Christiansborgimi sulisoq, Hans Bendixen, ukiuni 40-ni sulisimanerminut ilasseqatigiissitsisuuvoq.
Folketingimi sapaatip akunnerani aggersumi pissanganartunik pisoqassaaq, tassani ilaatigut Mette Frederiksen apeqqarissaarfigineqassaaq.