Pissaanermik atuisarnerup nalunaarutigineqartannginneri, utoqqaat anitsaaliorniarlugit matut allunaasamik qilersorneqartarnerat, utoqqaat ilaat nutaamik nangilerneqarnissaminnut ullut pingasut utaqqisariaqarnerat, sulisullu sulinngitsuukulaarnerat. Ombudsmandip Qasigiannguani Qeersaat Illuanni misissuinerani nalunaarusiami ersersinneqartut ernumanartoqarput, pissutsillu taamaannerat akuersaarneqarsinnaanani
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq.
Ombudsmandip Qasigiannguani Qeersaat Illuani nalunaarusiaa kingulleq saqqummertoq ernumanartorpassuarnik saqqummiussivoq. Utoqqaat ulluinnarni utoqqaat illuani qanoq atugaqartinneqarsinnaanerat ilaatigut saqqummiunneqarpoq. Pissutsillu akuersaarnanngitsut piaartumik iluarsisariaqarput.
Kommune Qeqertalimmi utoqqartavut taamatut pineqartussaanngillat. Utoqqaat inuttut naligalugit toqqissisimanartumillu avatangiiseqarlutik inuunerup naggatissaa tikillugu atugaqartinneqartariaqarput.
Pissaanermik atuisarnerup inatsisitigut pisussaaffiunera kommunitsinni utoqqaat illuini tamani ilisimaneqartariaqarpoq. Tamanna ulluinnarni ingerlatsinermi pisortaqatigiit paaseqatigiillutik suliassaq pinartutut peqqissaarullugu suliarisariaqarpaat. Utoqqaat anitsaaliorniarlugit matunik qilersuinerit akuersaarneqarsinnaanngillat unitsilluinnarneqartariaqarlutillu.
Sulisut piginnaasaqarluartut aalajaatsullu sulisorinissaannut kajumissuseqalersinniarlugit sulinermi atugassarititaasut pitsaasuusariaqarput. Suliffik isumannaatsuussappat kajungernassappallu sulinermi avatangiisit pillugit pitsaasumik najoqqutassaqarnissaq pisariaqarpoq. Suliffik toqqissisimanartoq pilersinniarlugu, aammalu sulisut piginnaasarluartut aalajaatsullu sulisorinissaannut kajumissuseqalersinniarlugit sullivimmi avatangiisit pillugit najoqqutassat pitsaasut pilersinniarlugit aqutsisooqatigiit pilersaarusiorluartariaqarput, Matumani Qeersaat Illuat aammalu Kommune Qeqertalimmi utoqqaat illui tamarmik pineqarput. Ataatsimiititaliaq Inuit-ni siulittaasoq aammalu Kommune Qeqertalimmi borgmesteri Ombudsmandip nalunaarusiaa pillugu saqqummertariaqarput isummerlutillu.