Atuarfiit matuneqarnerisa nalaani suliffeqarfiit ikiueqqullugit Siumup kaammattorpai
Kommuneqarfik Sermersuummi Siumut kaammattuivoq, atuarfiit matoqqatinneqarallarnissaata nalaani suliffeqarfiit ikiuuteqqullugit. Suliffeqarfiit nerisarfinnik, ininik imaluunniit nukissanik allanik peqarunik kaammattorneqarput taakku atuartunut angajullernut, pingaartumik misilitsinnissamik piareersartunut, atorneqarsinnaasunngorlugit periarfisseeqqullugit. Siunertarineqarpoq meeqqat atuarnerat qulakkeerneqassasoq aamma, naak atuarfiit unamminartorsioraluartut, misilitsinnissamut piareersarfissanik meeqqat periarfissaqassasut – kommunip, angajoqqaat suliffeqarfiillu akornanni suleqatigiinnikkut.
All.: Dorthe-Marie Mogensen-Fontain, Sermersuummi Siumup gruppiata siulittaasuat
Siumut Sermersuummi kommunalbestyrelsimut ilaasortaasugut, Kommuneqarfik Sermersuumi atuarfeqarfiit matunissaat aammalu atuarfissuaq ammarsinnaannginnera peqqutigalugu suliffeqarfiit sapinngitsut ikiueqqullugit saaffigerusuppagut.
Meeqqat atuartut atuarnissaat pingaartillugu, meeqqallu angajullerni misilitsittussat suliffeqarfinnut ingerlalerumaartussallu pillugit, suliffeqarfinnut saaffiginnissutigerusuppagut suliffeqarfissinni aaqqiissutissaqarussi peqataaqqullusi.
Suliffeqarfiuguit meerartatsinnut suliniuteqartoq, nerisarfeqarussi anngajaamik, atuartunik avatangiiseqarsinnaallusi aammalu siunissamut qulakkeerinneqataassallusi piumassuseqarussi, pisariaqarmat toqqaannaq suleqatigerusuppatsigit.
Immikkuullarissumillu pisoqarnerani immikkuullarissumik iliuuseqarsinnaaneq ataatsimoorullugu aaqqiissutissaqarnissamik ujartueqatigaatsigit. Meerartavut siunissami suliffeqarfinnut ingerlaqqittussaapput, taakkulu aamma misileraasarput suliffeqarfinni sulillutik.
Nerisarfisi kantiinarsi ulluinnarni tiimerpaaluit atorneqarneq ajorpata, angajullernut atuartunut sinaakkutilimmik isumaqatigiissutilimmillu attartorneqarsinnaanersut paaserusuppagut.
Atuartut misilitsittussat klassit tamarmik misilitsinnissaanut piareersaateqartut ingerlalluaqqullugit assagut isaakkusuppagut, suliffeqarfiillu kaammattorusullugit inersuit taamaattut suulluunniit pisariaqartikkatsigit.
Siumumiit aaqqiissutissatut taamatut takusinnaasarput avammut isaassilluta ingerlateqqikkusupparput, isumaqaratta kivitseqatigiinnikkut aammalu angajoqqaat suleqatigalugit misilitsinnissamut annertuumik iluaqusersuutaasinnaammata.
Suliffeqarfiit nerisarfii amerlasuut ilimagaarput tiimerpaaluit atorneqarneq ajortut, atorluarsinnaagaluartut. Suliffeqarfiit qinnuigissavagut peqarunik kivitseqataarusukkunillu meerartatsinnut isumaqatigiissusiornissamut siunnerfeqaqqullugit.
Nalunngilarpummi ASK aamma oqoqartoq, piffissarlu kisimi apeqqutaassaaq matuneqarnissaanut. Taamaattumik atuartut angajulliit aammalu immikkut misilitsittussat isiginiaqqullugit taamatut suliniuteqaqataasinnaanerannik kaammattorumavagut.