Aqutsiveqarfik 47 pillugu apeqquteqaat

Karl Tobiassen, Inatsisartunut ilaasortaq

Inatsisartut suleriaasianni  §  37 imm. 1 naapertorlugu Naalakkersuisunut apeqqut imaattoq matumuuna saqqummiuppara:

Naalakkersuisunut apeqqut:

  1. Naalakkersuisut qaleralinniarnermi aqutsiveqarfinnik 47-mik marloriarlutik piffissap sivikitsup ingerlanerani allannguisaarnerminni kikkut tusarniaaffiginikuuaat?
    1. Tusarniaasoqarsimappat tusarniutigineqartoq akissutigineqartullu sumi sukkullu takuneqarsinnaappat?
  2. Allannguisaarnerit kingunerinik Nalunaarutit suut atuuttussanngortinneqarnikuuppat?
  3. SIK Kattuffiit Tunitsiviit aalisartullu aalisakkat pisassiissutit ukiumut qanoq aalisarneqarnissaat Nalunaarusiorfigissallugu Naalakkersuisut sinnerlugit pisussaaffeqarpat?
  4. Naalakkersuisut taamatut innersuussinerminni pineqartut aaqqissuussinissaminnik malitassaannik aaliangersagaliornikuuppat?
    1. Taamaattoqarpallu sumi sukkullu nassaarisinnaavavut?
  5. Qaammatit pingasukkaarlugit qaleralittassat pisassiissutigineqartalerneranni allaffissornermi aningaasanik qanoq annertutigisunik sipaaruteqarnissartik Naalakkersuisut naatsorsuutigaat?
  6. Naalakkersuisut qaleralittassat aqutsiveqarfinni nungunneqarnissaat ilimanarsippat TAC-p qaavatigut kulturikkut pisassiissutinik taajuuserlugit ilasisarnissartik siunertarivaat?
    1. Taamaattoqassappallu iliuusissat periusissallu suut malittaralugit pisassiisoqartassava?
    1. Periuseq tamanna atuutsinneqalissappat allaffissornermut qanoq sunniuteqassua?
  7. Ukiuni kingullerni tallimani sinerissap qanittuani qaleralittassat ilaannik Naalakkersuisut avataanut nuussisarnikuuppat?
    1. Ukiunilu taakkunani tons qanoq annertutigisut sinerissap qanittuaniit avataanut nuunneqarnikuuppat?
  8. Avataanut pisassanik nuussisoqartarsimappat aalisartut niuffatigalugit pisassaannut (kvote) ukiut tallimat iluanni qanoq sunniuteqarnikuuppat?
  9. Kvotellit pisassaatiminnik qanoq appaaffigineqarnikuuppat?

Tunngavilersuut:

Taamatut apeqquteqarnissaq pisariaqatilerpara Aalisarnermut Piniarnermut Naalakkersuisoq 22. februar 2022 Qanoruukkoornermini oqariartuutaai pissutsinut piviusunut ataqatigiinngippallaarsorigakkit.

Kissaatigaara apeqqutima ullut suliffiusut 10-it iluini akineqarnissaat.