Inuiaqatigiinni inuuniarnikkut akit qaffakkiartornerat ulluinnarni ilungersunartumiititsereersut siunissami qaninnerusumi suli inuuniapiloornissamik kinguneqaratarsinnaanerat aarlerinarluinnarpoq. Inuiaqatigiinni pissakinnerusut, akunnattumik isertitallik, nunaqarfinniittut isorliunerusuniittullu eqqornerlunneqarput, tamannalu unitsinniarlugu Naalakkersuinikkut piaartumik iliuuseqartoqartariaqarpoq.
Af Doris J. Jensen, medlem af Inatsisartut, Siumut
Akinik qaffaasaqattaarneq inuiaqatigiinnut artukkiivoq aarlerinarporlu suli ajornerusumik siunissami qaninnerusumi killiffeqarnissarput.
Akissaatitigut qaffaassutissat isumaqatiginninniutigineqarnerini isumaqatiginninniarnerit suliluunniit naammassinngitsut pisissutigineqarsinnaasut annertuumik mangiarneqalereertut takuneqarsinnaavoq tassanilu RAL-ip ukiumi nutaami qaffaassutissai tikkuarneqaannarsinnaapput.
Taamatuttaaq Pilersuisumi akit qaffasereertigisut suli qaffannerunissaat suaarutigineqareersoq inuiaqatigiit ajorsartussianngortinneqarnissaat takorloorneqarsinnaanngilarluunniit, inuuniarneq ilungersunareertigisoq qaavatigut suli aamma ilungersunarninngorlugu killiffeqartoqassappat tamanna inooqataaffigineqarsinnaanngilaq.
Ilungersunarluinnartumik killiffeqarnitsinni, inuit inuussutissanut allanullu akissaat naleerukkiartuinnarpoq.
Siuttooqataanitsinni nunatsinni innuttaasut artorsikkiartuaarneqarnerat piaartumik unitsinniarlugu Naalakkersuinikkut iliuuseqartoqartariaqarpoq. Tassami pissakinnerusunut oqilisaassiniarluta taamatullu siunertaqarluta siunertaqarnitsinni killormut ingerlaneq akuersaarneqarsinnaanngimmat.
Nioqqutissat akiisa qaffakkiartuinnarneranni inuiaqatigiit pissakinnerusunut, akunnattumik isertitallit, nunaqarfinniittut isorliunerusuniittullu eqqornerlunneqarput.
Matumuuna Siumup Inatsisartut gruppiani aammalu Siumut Siulersuisuunerini qulequttap piaartumik eqqartorneqarnissaa kissaatigaara.
All: Doris J. Jensen, Inatsisartunut Ilaasortaq, Siumut