Inuiaqatigiit pisuusataat inuiaqatigiit pigaat. Ullumikkut aalisarnermut inatsit, soorlu raajarniarnermut, siunissami allanut inuussutissarsiuteqalerusuttunnut periarfissiinerusoq pilersinneqassasoq Siumut isumaqarpoq.
Aalisarnermut pillugu Ataatsimiititaliarsuup raajarniarneq pillugu innersuussuteqarnerminni innersuussutigaa, pisassiissutit ukiunut qulinut atuuttussanngortillugit atugassiissutigineqartassasut, taakkulu ataavartumik ingerlaqqittassasut.
Siumut isumaqarpoq pisassiissutaasimasut tamarmik ukiut tallimat qaangiukkaangata pissutissaqartillugu, soorlu maleruagassat unioqqutinneqarsimatillugit imaluunniit tamakkiisumik aalisarneqarsimatinnagit, inuiaqatigiinnut pisariitsumik utertinneqarsinnaanngussasut.
– Siumut isumaqarpoq, pisassiissutit piffissap ingerlanerani ingerlatserusuttunut amerlanerusunut siammaanissaat qulakkeerneqassasoq, aalisarnerlu ineriartorfiulluni inuiaqatigiinnullu iluaqutaanerulerluni ingerlanissaa qulakkeerneqarsimassasoq, Jens Kristian Therkelsen oqarpoq.
Pisassiissutit annerpaamik toqqaannartumik toqqaannanngitsumillu 20 procentimut qaffasinnerpaaffilernissaat piumasaqaataassasoq ilanngullugu Siumut isumaqarpoq. 20 procentimiit appasinnerusumik pisassiisalernissamut Siumut oqaloqataasinnaavoq.
– Avataasiorluni raajarniarnermut kalaaleqativut tutsuiginartumik akilersinnaasumillu ingerlatserusuttut amerlanerpaat periarfissinneqarnissaat isiginiassallugu pingaaruteqarpoq, Jens Kristian Therkelsen oqarpoq nangillunilu:
– Avaasiorlutik pisassallit sinerissap qanittuani pisassinneqartannginnissaat ilanngulluni toqqammaviussasoq Siumut isumaqarpoq, aamma sinerissap qanittuani piginneqataasinnaanerat killilersimaarneqassasoq Siumut isumaqarpoq. Avataasiortut sinerissap qanittuani immikkut akuersissuteqarlutik kilisaatinik aqqusaarlutik aalisarsinnaanerat ilanngulluni pinaveersaartinneqarnissaa pisariaqarpoq, tassami sumiiffimmi aalisartunut inuussutissarsiorniartunullu annertuumik akornusersuisinnaasartoq misilittakkat takutereeraat Siumut isumaqarpoq, Jens Kristian Therkelsen oqarpoq.
Pisassiisarnermut qaffasinnerpaaffiliinissamullu atatillugu, inuiaqatigiinniit tamakkiisumik pigineqartoq Royal Greenland A/S, ikaarsaariarnermi immikkut isigineqassasoq Siumut isumaqarpoq. Tamatumani nunaqarfippassuarni tunitsivinnik ingerlataqarnera aamma nunaqarfiit inuussutissarsiornerannut eqquinerlunnginnissaq pineqarpoq.
– Nunap immikkoortuini aalisarnermik inuussutissarsiornerup pineqartunut inuiaqatigiinnullu aningaasarsiutaalluarnissaa tamatsinnut pisussaaffiliivoq.Taamaakkami pisassiissutit tamarmik piumasaqaasersuiffigineqartalernissaat pisariaqavippoq, aamma pisassiissutit selskabit akunneranni niuerutaasinnaanerat tamatta iluaqusersorneqarnissarput pillugu aqunneqarnerulernissaat pillugu nalilersuisoqassasoq isumaqarpugut, Jens Kristian Therkelsen oqarpoq nangillunilu:
– Unammilleqatigiinneq amerlanerpaanit peqataaffigineqarsinnaasoq pilersikkumavarput. Ilanngullugu sinerissap qanittuani aalisartut eqqarsaatigalugit, avammut niuernissamut akuersissutit nutarterneqarnissaat pisariillisarneqarnissaallu pisariaqartutut isigaarput, Jens Kristian Therkelsen oqarpoq.
–
Siumup aalisarnermut inatsisissamut sinaakkusiussai saqqummiussuuneqarlutik ingerlanneqarput. Una nalunaarutit tallimaassussatut naatsorsuutigineqartut aappassaraat.