Pisassiissutit tamarmik qallorneqarlik
Naalakkersuisut aningaasanik pisariaqartitsinertut oqariartuutaat Siumumit maluginiarparput, illuatungaanili pisassiissutit suli tamakkerlugit atorneqanngillat aammalu agguaanneqarnissaat kinguaattoorpoq. Tamanna naapertuutinngilaq. Pisassiissutit nutaat siorna aalisartussarsiuunneqartut suli atorneqalinngillat, naak siornali aalajangiiffigineqarsimagaluartut. Tamanna inuiaqatigiinnut aningaasatigut annaasaqaataavoq aammalu inuussutissarsiortunut periarfissanik unitsitsinerulluni.
Siumut isumaqarpoq aalisagartassiissutit tamarmik qallorneqartariaqartut. TAC tamakkerlugu qaqinneqartariaqarpoq. Nunatta pisuussutai inuiaqatigiinnut iluaqutaassapput, aammalu aningaasat inuiaqatigiinnut pisariaqartinneqartut tamakkerlugit atorneqartariaqarlutik.
Pisassiissutit ukioq manna apriilimi tunniunneqarnissaat naatsorsuutigineqarsimagaluarpoq, kisianni suli agguaanneqanngillat. Tamanna aalisartunut, suliffeqarfinnut aammalu nutaanik ingerlatsilersunut nalorninermik pilersitsivoq. Tamanna Naalakkersuisooqatigiit avissaartuunnerannik tunngaveqarpa?
Siumut aamma erseqqissumik isumaqarpoq nunatsinni pisuussutit inuiaqatigiinnit kalaallinit pigineqartuusariaqartut. Taamaattumik ingerlatseqatigiiffiit nutaat kalaallinit tamakkiisumik pigineqartut salliutinneqarnissaat pingaaruteqartorujussuuvoq, soorlu aamma tamanna aalisarnermut inatsimmi qulakkeerneqarniartoq.
Naalakkersuisut maanna piaartumik erseqqissumik nalunaaruteqartariaqarput aammalu agguaassineq naapertuilluartumik ingerlanneqarnissaa qulakkeertariaqarlugu.
Erik Jensen, Inatsisartuni gruppip siulittaasua, Aalisarnermut oqaaseqartartoq
Siumut