Nalunaaquttamut tunngasoq Naalakkersuisooqatigiinniit kinguarsarneqaqattaarpoq
2024-imili Siumut sinnerlugu nalunaaqutap UTC -3-mut uterteqqinneqarnissaa pillugu
ilungersorluta Inatsisartuni inatsisissatut siunnersuummik saqqummiisaqattaalerpugut. Upernaaq
mannalu kiisami inaarutaasumik isummernissaq pilluinnalersorlu Naalakkersuisooqatigiit
aaliangiisinnaannginnerat aammalu paasissutissanik annerusuminngooq pisariaqartitsimmata,
suliassaq kinguarteqqinneqarpoq – ukiamut 2026-imut. Naalakkersuisooqatigiit tupinnaqaat
innuttaasut amerlangaartut minnerunngitsumillu aalisartut piniartullu tusaajunnaavillugit
pissusilersulernerat Siumumiit imaannaanngitsorujussuartut nalilerparput.
Taamaattumik ullaap tungaa 12. maj 2026 Inatsisartut ataatsimiinnerat aallartimmat, Siumumiit
assorujussuaq tupigusuutigaarput UTC-3-mut nuunnissaq aammalu aasaanerani nalunaaquttap
allanngortinneqartarneranik atorunnaarsitsineq pillugit Inatsisartut siunnersuummik
suliarinninnerat (kiisarsi) kinguarteqqinneqarmat – maanna aatsaat ukiakkut ataatsimiinnermi 2026
sammineqaqqinneqartussanngorpoq.
Siunnersuutit marluusut arlaleriarlutik kinguartinneqaqattaarput, siullermik USA-p tatisiniarnera
tunngavilersuutaalluni, kingorna ataatsimiititaliap suli sukumiinerusunik paasissutissanik
pisariaqartitsisoq oqaatigineqarluni. Kingullermik ulloq 5. maj aappassaaneerinninneq
unitsinneqarpoq Inatsisinut Ataatsimiititaliamullu utertinneqarluni, naak suliaq sivisuumik
sukumiisumik suliarineqareersimagaluartoq.
Siumumiit Inatsisartut aalajangiinissamik kinguartitsisaqattaarnerat
aaliangiisinnaassuseqannginnermik aammalu innuttaasunik tusaajumajunnaarnermik
ersersitsisutut isigaarput, aalajangiiniaaluusaarnerummi innuttaasorpassuit, inunnik innarluutilinnik
meerallit, inuussutissarsiuteqartullu imaannaanngitsumik sunneqqavai. Siumumiit isumaqarpugut
kinguarsaanermut patsisissarsiornissamut paasissutissanik ujarlertoqarpasissutut
isikkoqaleriartortoq itigartitsinissamut siuliani tunngavilersuutit siulliit naammanngimmata.
Isumaqarpugut innuttaasut apeqqut pillugu ammasumik unneqqarissumillu oqallinnissamut
pisinnaatitaaffeqartut – suliarlu kinguartitsinernik uteqattaartunik aammalu nassuiaatinik
ersernerluttunik ingerlanneqartoq.UTC-3-mut uteqqinnissaq aammalu aasaanerani nalunaaquttap allanngortinneqartarneranik
atorunnaarsitsineq pillugit siunnersuutit tunngaviatigut ima isumaqarfigaagut: Kalaallit Nunaanni
nalunaaqutaq nunatsinnut aammalu nunarsuarmi inissisimaffitsinnut naapertuutissasoq – nunat
allat pisariaqartitaat imaluunniit isumakuluffigineri aallaavigalugu aalajangerneqassanngitsoq.
Siumumiillu maluginianngitsuunngilarput nalunaaquttap allanngorsimanera (UTC -2-mut) ilaatigut
tunngavilersuutiginiarneqarmat Air Greenland aningaasatigut pitsaanerusumik
ingerlatsisinnaaneranik Naalakkersuisooqatigiit isumaqalersimammata. Tamannami
naammattumik uppernarsaatissaqarfigineqanngilaq. Taamaattumik Naalakkersuisut siulittaasuata
nassuiaatigisai illersorneqarsinnaajunnaariartornerannik peqquteqarpa maanna siunnersuummik
kinguarsaanerannut?
Tassami siullertut nalunaaquttap allanngornera tunngavigalugu Air Greenland aningaasatigut
ingerlanera pitsaanerulernikuunngilaq, aappaattullu angalanermi akit (billitsit akii)
akikilliartunngiivillutik. Taamaattumik Siumumiit qanoq aaliangernissaq
nalornissutaanngilluinnarparput illuatungaanilu inuiaqatigiit paasisariaqarpaat
Naalakkersuisooqatigiit inatsisartuni ilaasortaatitai aaliangiisinnaanngitsutut inisseqqanerat,
kinguarsaaleqqanerallu ersarissigaluttuinnartoq isumaqarpugut. Imaluunniit tamanna
Naalakkersuisooqatigiit avissaartuussimanerannik ersiutaanerpoq?
Siumup innuttaasut amerlaqisut kissaataat aammalu partiit nassuerlutik aaqqiissutissarsiornissamut
pisoqarnissaanik tusaallutik pilernissaat sakkortuumik kaammattuutigerusupparput.
Taamaattumik pingaaruteqarpoq Inatsisartut akisussaaffimmik tigusillutik politikkikkut
aalajangiissasut, suliaq naassaanngitsumik sivitsortinnagu.
Siumup ingerlaannartumik sulissutigissavaa suliaq aammaarluni eqqortumik aammalu
pisariaqanngitsumik kinguarsaanertaqanngitsumik suliarineqassasoq. Siumumiillu maanna
Inatsisartut siulittaasoqarfianut paasiniarlugu aallartipparput kinguartitsinermut suut
tunngavilersuutaasimanersut.