Aningaasarsiorneq

Siumut isumaqarpoq, Nunarput tapiissutinik tunngaveqarnerulluni ingerlassanngitsoq. Pisuussutivut, sulisinnaassuserput periarfissallu nutaat atorlugit inuit inuussutissarsiornerlu nukittorsarneqassapput ineriartorlutillu.

Nunarput allanit aningaasalersorneqaannarluni isumalluuteqarlunilu ingerlaannassanngilaq. Siunissarput nammineq aqullugu ilusilersussagipput Siumut isumaqarpoq, aamma aningaasarsiornerup nukittuumik inissisimanissaa pingaaruteqarluinnartuuvoq. Nammineq pisuussutivut, sulisinnaassuserput toqqakkavullu tunngavigalugit aningaasarsiornikkut ineriartorneq ingerlanneqassaaq.

Siumut aningaasarsiornermut politiki aqqutigalugu namminiussuseqarnitsinnik nukittorsaalluni ingerlatsiumavoq, tapiissutit isumalluutigineqarnerat millisarlugu sumiiffinnilu naleqarnerulersitsineq aningaasarsornerlu nukittorsarlugit. Siumut isumaqarpoq, aningaasaqarnikkut kiffaanngissuseqarneq tassaasoq politikikkut kiffaanngissuseqarnermut aqqut.

Nuna tamakkerlugu aningaasarsiornikkut ineriartorneq aallarteqqullugu, makku periarfissiissutitut pilersiortorneqassapput:

• Aalisarneq, takornariaqarneq, aatsitassat, inuussutissalerineq aamma mingutsitsinngitsumik nukissiuuteqarneq annertuumik ineriartorfissatut aningaasaliiffigineqassapput.
• Suliffissat ilinniarfissallu amerlanerusut pilersinneqassapput, pingaartumik inuusuttavut pillugit.
• Suliffeqarfiit pisariaqartitsisut aningaasaliissutinut, tapersersorneqarnissamut siunnersorneqarnissamullu pitsaanerusumik periarfissaqartinneqassapput.
• Nunatsinni nutaaliorsinnaaneq teknologiimillu ineriartortitsineq siuarsarneqassapput, soorlu AI / silassorissuusiaq atorlugu ineriartortitsineq ingerlallugu.

Nunarput taamaallaat naammassineqarsimanngitsunik avammut niueruteqassanngilaq. Nunatsinni aamma naammassineqarsimasunik nioqqutissiorneq aqqutissiuunneqassaaq nunatsinnilu suliffissat amerlanerusut pilersinneqarlutik.

Akilersinnaasumik ineriartornissaq pisariaqarpoq. Siumup anguniarpaa, nunatsinni aningaasarsiorneq attanneqarsinnaasumik tunngavilik issittumi siuttuuffigissagipput. Taamaattumik makku pilersiortorniarlugit sulisoqassaaq:

• Mingutsitsinngitsumik nukissiuuteqarneq annertusarneqassaaq – erngup, seqerngup anorillu nukingat atorlugit.
• Illut, suliffiit angallassinerlu nukissamik mingutsitsinnginnerusumik atuisunngoqqullugit ineriartortitsiviussapput.
• Suliffeqarfiit attanneqarsinnaasumik nukissalersorneqartut tunngavigalugit, nunanut allanut aaqqiissutaasimasutut ilisimalikkallu suliffeqarfinnit niuerutigineqarnissaat aqqutissiuunneqassaaq.

Attanneqarsinnaasumik akilersinnaasumillu ingerlatsinerit kalaallit namminneq piumasaqaataanik tunngavilerneqarsimassapput, kalaallinillu piginnittuuffigineqarlutik.

Inuutissarsiorneq kalaallinit tunngavilerneqarsimasoq ineriartortinneqassaaq, tamannalu peqqullugu makku sulissutigineqassapput:

• Suliffeqarfiit nunatsinni piusut salliutinneqassapput, aamma pisortat suliariumannittussarsiortarneranni.
• Suliffeqarfimmik pilersitsinissaq pisariitsuussaaq.
• Allaffissornikkut aporfilersuineq nungusarneqassaaq, ilaatigut inatsisit kumaarnerisigut digitalimillu sullissineq nukittorsarneratigut.
• Piginnaasat, pilersitsisinnaassuseqarneq aningaasatigullu ineriartorneq salliutinneqassapput.

Siumup anguniarpaa pisuussutit nunatsinni pilersinneqarsimasut nunatsinni iluaqutaassasut, nunanullu allanut uatsinnut iluaqutaanngitsumik tammakaatinneqassanngitsut.

Siumup qulakkeerumavaa sulineq iliuuseqarnerlu akilersinnaassasut, taamaattumik makku qulakkeerneqassapput:

• Qulakkeerneqassaaq akissarsiat inuuniarnermut naapertuutissasut.
• Ilanngaatit illutaarnissamut, ilinniagaqarnissamut suliffeqarfittaarnissamulluunniit naleqqussarlugit aaqqissuussivigineqassapput.
• Akileraartarneq pisariitsumik aaqqissuunneqarsimasoq aamma naapertuilluartoq eqqunneqassaaq.

Pinngortitami pisoorsuuffiusinnaasumi inuuvugut, taamaattumik piitsutut inuuneq naaggaarluinnarparput, upperaarpullu periarfissat assigiit pisariitsullu tamanut atuutsinnerisigut allanit isumalluuteqarneq annikilliartortinneqarsinnaasoq.

Siumup aningaasarsiornermut politiki aqqutigalugu aningaasanik aqutsilluarneq ingerlatissavaa. Taamaattumik makku eqqanaarneqarsimanissaat pinngitsoorneqarsinnaanngilaq:

• Ukiumiit ukiumut tapiissutit qanoq agguaateqqinneqarnissaat kisiat pinnagu, aningaasarsiornerulernissaq siunertaralugu ukiunut arlariinnut aningaasalersuinissaq pilersaaruteqarfigineqartassaaq.
• Aningaasat pisortat atugaat sapinngisamik ingerlatsinermiit aningaassaliissuteqarnermut nuunneqassapput.
• Aningaaserivinnik, aningaasaliisartunik nunarsuarmilu taamak ingerlatsivinnut suleqateqarneq pitsanngorsarneqarlunilu nukittorsarneqassaaq.
• Aningaasat naleerukkiartornerisa sapinngisamik aqunneqarnissaat aamma aningaasatigut patajaatsumik ingerlatsinerup qulakkeersimaneqarnissaa toqqammaviussapput, namminiussuseqarnitsinnut tamarmik annertusiartortitsisussat.

Tapiissutinik isumalluuteqarnerunerput qimakkiartorlugu ingerlarusuppugut, tamannalu aatsaat piviusunngorsinnaavoq sulisinnaasortavut nunattalu pisuussutai sutigut tamatigut atorluarnerisigut. Siunissami kinguaariit kiffaanngissuseqarlutik inuuneqarnissaat pinngitsoorata qulakkiigassaraarput.