Maajip aallaqqaataani 2023 Siumup siulittaasuata oqalugiaataa
All.: Erik Jensen, Siumup siulittaasua
Siumut sinnerlugu sulisartut ulluanni tamassi pilluangaaritsi, minnerunngitsumik SIK-mi siuttut sulisartullu tamassi maanni najuuttusi ullorsiornissinni pilluangaaritsi – qujanarlu oqaaseqarnissamut Siumut maannga aggersarneqarsimammat.
Siumut sulinermi i tunngavigai inuiaqatigiit ataqatigiissut, ilatsiinnartuunngitsut, eqeersimaartut nappassinnaalluartullu.
Kiffaanngissuseqarneq aningaasaqarnermut tunngassuteqartoq nalunngilluarparput, taamaakkamilu ulluni makkunani partiit akunneranni suleqatigiillutik akileraartarnermik aaqqissuusseqqillutik ingerlatsipput. Siumut isumaqarpoq, tamatumani sulisartukkormiut pisissutigisinnaasaannik aammalu kaasarfimmioqarnerulernissaannik imalimmik suliaq tunngaveqassasoq anguneqassasorlu – Sulinermi akilersinnaanerulertinneqarnissaa Siumup pingaartitaraa, taannalu piviusunngortinniarlugu Siumumi politikkikkut sulinerput ingerlapparput.
Nunarpummi inukilliartorpoq, aningaasaqarnermullu siunnersuisooqatigiit ilimasaarutigalugu ukiut 15-20-it missaat qaangiuppata nunatsinni inuit 48.000-iinnanngussasugut. Taamaattumik nunarput najoruminarnerusariaqarpoq aammalu sulisartuuffigissallugu pitsaanerusunik atugaqartitsinissaa pingaaruteqarnerpaajuvoq. Tassa sulisartunut aalisartunut piniartunut manna nuna asasarput suliffigissallugu Siumut ilungersuutigalugu tunngavissilluarnissaa aaqqissuusseqqinnermi ilungersuutiginerpaasaasa ilagaat.
Inuup kiffaanngissuseqarnissaanut atalluinnarpoq kikkut tamarmik suliffissaqarnissaat. Nunatsinnilu aningaasaqarnikkut naapertuilluartumik ingerlatsineq kikkullu tamarmik inuiaqatigiit ajunngitsorsiassaannut ajunnginnerusumik oqimaaqatigiittumillu periarfissaqartitaanissaat naammassisassatta ilagigaat isumaqarpunga.
Nunatsinni inuiaqatigiit aningaasaqarnikkut politikikkullu nammineersut ilungersuutigiuarsimavagut, taamaammallu Inuiattut namminersulernissaq – naalagaaffinngornissaq – pingaartutut isigaarput. Siumut isumaqarpoq Namminersulersimanerput ingerlaqqittumik aqqutissiuunnissaa tullinnguutissasoq.
Siumumi ilungersorluta sulivugut angusassarput angutserlugu. Nunarput inuilu imminut napatittut pilersissallugit.
SIK siulittaasuata oqariartuutai isumaqatigaakka “iluarsisariallit aaqqitassagut amerlaqaat”. Taakkuli aaqqissappata ataatsimoorluta suleqatigiinnissarput avaqqunneqarsinnaanngilaq. Immitsinnut tinnersarsinnaanerput uparuarsinnaanerput aporfiginagu kisiannili ataatsimoorluta suleqatigiinnikkut aaqqiissutissanik oqaloqatigiissuteqarnikkut.
Ippassaanikkunni Ilisimatusarfimmi persuarsiornaqisumik Tunngaviusumik Inatsisissatut siunnersuut Inatsisartunut inuiaqatigiinnillu tunniunneqarpoq, taannalu ilanngulluni suleqqinnissatsinnut sakkussat ilagissavaat, inuiaqatigiittut tamatta pigisassarput. Siumup naatsorsuutigilluinnarpaa, Inatsisissatut siunnersuut inuiaqatigiinni angallanneqassasoq oqaluuserineqarlunilu.
Sulinermik Inuussutissarsiuteqartut Kattuffiat aamma Siumut, qaninnerusumik ulluinnarsiutigalugu suleqatigiinnissaat siorna maani oqalugiarama oqaatsigaara. Taamaattumik uteqqikkusuppakka, immitsinnut pisariaqartippugut tamatta, pisariaqaqaarlu sulinerput suleqatigiinnermik tunngavilimmik ingerlakkutsigu angusassarput pitsaanerusussaq angujuminarnerulissammat.
Siumup politikikkut suliniaqatigiiffittut sulisut kikkulluunniit inuussutissarsiortullu – pingaartumik aalisartut, piniartut, sulisartut savaatillillu sorlaqarfimmisut isigisarpai. Siumut partiitut akisussaasulittut taamak tunngaveqarluni ingerlaqqissaaq, qularutiginngilaralu SIK siunissarput pillugu sulinissatsinnut qanimut suleqatigilluarumaaripput.
Taamak oqaaseqarlunga sulisartut tamaasa qamannga pisumik ullorsiorneranni – Siumut sinnerlugu – pilluaqqungaarpassi, ullorsiorluarisilu.
Qujanaq.
–
SIK-p Nuummi katersortarfimmi ullorsiornera, maajip aallaqqaataat 2023. Oqaatsit atorneqartut atuupput.