Juulip aallaqqaataani inatsit atuutilertussaq akuerseqatigiilluni atoqatigiinneq pillugu meerartagut inuusuttortagullu peqataatillugit oqaloqatigiinnerit aallartittariaqarpagut. Tamatumanilu tamatta immitsinnut pisariaqartippugut.
All.: Paarnannguaq Mathiassen, Siumut Ilulissat
Killissaq, killissamik qaangiisarneq aammalu akuersaaqatigiilluni atoqatigiinnerup assigiinngissutaat eqqartorlugillu ersarissarnerusariaqarpagut. Isumaqarama taamaasiornikkut siusinaartumik iliuuseqarneq alloriarfigineqarlunilu nukittorsarneqarsinnaasoq. Ilisimavarpummi killissamik qaangiilluni atoqateqarniartarnerit, kinguaassiutitigullu atornerluisarneq inuiaqatigiinni ajornartorsiutaasut annertuut.
Meeqqat inuusuttullu inuuniarnikkut naammaginartumik atugaqarnissaat isumannaassallugu inersimasuusugut pisussaaffeqarpugut, tamannalu naalagaaffiit peqatigiit meeqqat pillugit isumaqatigiissutaani aamma allassimavoq.
Inuiaqatigiinni suliassamik pingaaruteqarluinnartumik suliassaqarpugut, tamatumanilu tamatta immitsinnut pisariaqartippugut. Isumaqarpunga piffissanngortoq meeqqat inuusuttullu peqataatillugit inuiaqatigiinni eqqartussallugu illit nammineq killissatit ataqqineqartussaasut, uanga nammineq killissakka ataqqineqartussaasut, inuillu allat aamma killissaat ataqqineqartussaasut.
Inersimasuusugut meeqqat inuusuttullu peqataatillugit killissaq, killissamik qaangiisarneq aammalu akuersaaqatigiilluni atoqatigiinneq tamatta eqqartortariaqaripput isumaqarpunga, tassami taamaasiornikkut siusinaartumik iliuuseqarneq alloriarfigineqarlunilu nukittorsarneqarsinnaammat.