Kommunerujussuanngornerup aallartinneraniit maannamut Kommuneqarfik Sermersooq nunaqarfinnut pitsanngorsaanermik aaqqissuussisimaneranik tigussaasoqaranilu takussaasoqanngilaq, sulilu ajorsiartorpoq
All.: Laura Taunâjik Uitsatikitseq, Sermersuummi kommunalbestyrelsimut ilaasortaq
Ukiorpassuanngulersuni nunaqarfinni inissialiornikkut ineriartortoqanngilaq, killormulli illut isaterneqartut amerliartorput sulilu aamma amerliartuinnartussaallutik. Inissiassanik sanaartornissamut siunnersuutit amerlanerussuteqartunit itigartinneqartuaannarput ersarissunilli tunngavilersuutinik saqqummiussisoqanngisaannarluni. Tupinnanngilluinnarpoq Nuuk inuttusiartuinnarmat muminganimmi inoqarfiit mikinerusut inuerusarneqarput, naak nipituuliuutiginngikkaluaraat tusaaneqarsinnaanngitsumik periuseq tamanna ingerlanneqarpoq. Allaanngilarmi nipaarsaartumik nunaqarfinnik matooraanissaq anguniarneqartoq.
Ilinniartitsisut illutaat
1960-kkut ingerlaneranni sanaartorneqarsimasut suli taakkorpiaat ilinniartitsisunut attartortittagaapput. Illut pisoqalisimapput innaallagissamullu ikuallattooriataarnissamut aarlerinarsinnaasut arlaliupput. Illut nutaanngeqigamik siallertillugu igalaat killingatigut imeq ilumut isaasarpoq. Allaallumi pujoorfiit nalaatigut siallertillugu imeq ilummut isaaneratigut kiassaatit ajoquserneqartalerlutik. Anorlertillugulu pujoq ilummut isaaneratigut inuunilunnerit peqqiilliornerillu nalaanneqartalersimapput. Tamakku kinguneraat ilinniartitsisut suliffimmi nuannarinnikkaluartut allamut nuunnissamut eqqarsartalersimasut. Siunnersuutigineqarsimasullu ilagaat ilinniartitsisut illunik attartortagassaannik sanaartornissaq amerlanerussuteqartut aammaarlutik itigartinnikuuaat. Aali atuartitaanerup pitsaasumik ingerlanissaanut aqqutissaasut. Tassuunatigut ersinngitsumik inuerussaaniarnerit takuneqarsinnaalerput.
Niuertarfiit
Niuertarfeqarnikkut ukiut tamaaviisa ajorseriaatsit ersipput. Kiffartuussinissamut isumaqatigiissut qanoq taasariaassanerpa ukiulluunniit ingerlanerani naatitanik tikittoorsinnaanissaq ajornarsilluinnarsimavoq, illoqarfik nunaqarfillu ataaseq eqqaassanngikkaanni. Peqqinnartunik nerisassanik pilersorneqarneq ikkarlivissimavoq siuarsarneqaranilu. Pisiassat akikillineqarsinnaanngitsut muminganik kommuneqatigisaq niuertarfitsigut sorpassuarnik neqerooruterpassualik. Ila nunaqarfiit matuniarneqarnerat qaqugumita suaarutigineqassaqaa. Sulilumi kiffartuussineq ajorsiartormat, sumiginnagaanerlu ersarissoq qulaaniit aqunneqartoq nipituuliuutigineqanngimmat. Naak kialluunniit isigiarsuttup takusinnaagaa ajorseriaatsit suut piusut, tusilartullumi aamma tusaasinnaavaa atugarissaarneq suli nunaqarfimmi ajorsiartortoq.
Peqqinnissaqarfik
Peqqinnissaqarfik illoqarfimmiit sutigut tamatigut aqunneqarpoq. Torrallataanngilluinnartumik aqutsineq ingerlavoq. Qasseerpassuillumi annaanneqarsinnaagaluit sullarlunnerup kingunerisaanik toqukkut annaavagut. Allaat danskit oqaasiinik oqalussinnaagaanni nunatta avataanut sianerluni pinartoqartillugu ikiortissarsiorneq ingerlattariaqalersimavoq illoqarfimmiit ikiuussinnaaneq annikeruttormat. Pissutsit taamaapput, allatut kusassarniarneqaraluarpata oqaasiinnaapput tusarnersut. Inuup inuunera qanoq nalikitsigisutut isigineqartoq takullugu ernumaammernerujussuaq avaqqukkuminaaqaaq. Aali piviusut.
Utoqqaat illui
Ukiukkut qaliarpiaq apummik ulikkaaqqasoq, aakkiartornermini iikkatigut ammut kuuttoq, siallertillugu isersimaffiginiagaq isugutammik sussaanngitsoq. Aali utoqqaat illuat. Ukiumut qasseriaqaluni kiassaatitigut ajutoortoq ullorpaalunni utoqqaat qiiallutik angerlarsimaniarsarisut. Kiassaatillu supoortunik atuisariaqarnikkut innaallagissamut akiligassarujussuarnik pajutsittut. Pissutsit tamakku nalinginnaalersimapput. Saaffiginnikkaluallaraangamik susoqanngisaannartut. Ila suusupaginninneq sunaana taamak annertutigisoq. Pitsanngorsaavigineqarsinnaanngisaannartut naak siunnersuummik qaqitsisoqarnikuugaluaq amerlanerussuteqartunit itigartitsineq aasiit pimmat.
Eqqaamaniarsiuk issiavissi avataani allanik aamma inoqarmat, taakkulu eqqortumik pitsaasumillu kiffartuunneqarusupput ILISSITULLI.