Kommune Qeqertalimmi Borgmesterip oqaasiinnartigut qujasaasarnerpassui tusarluartaarutaannaat innuttaasut qinikkallu naammagiunnaarpaat. Pissutsit kusassarnagit iluarsisariaqartut unneqqarilluni nassuerutigineqartariaqalerput. Kusassaasoqarneratigut pissutsit piviusut iluarsisariaqartullu takkuitsoorneqassanngillat nassuerutigiumaneqaratillu.
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Innuttaasut amerlasuut kommunimut allakkatigut saaffiginnittaraluarlutik akissutisineq ajorput iliuuseqarfigineqassanatillu. Aamma kommunalbestyrelsimi ilaasortatut saaffiginnissutigineqartartut apeqquteqaatit oqaluuserisassatullu siunnersuutit tiguneqarneranilluunnit uppernarsarneqarneq ajorput, amerlasuullu iliuuseqarfigineqassanatik. Innuttaasuniit qinikkaniillu saaffiginnissutit qaapiaannartumik suusupagineqarlutillu kommunimi aqutsineq ingerlanneqarpoq. Kommune Qeqertalimmut oqaatsitigut allakkatigullu saaffiginnilluni allaanngilaq qarmarsuarmut apuinnarluni. Tamannalu akuersaarneqarsinnaanngilaq. Taamaammat Kommuninik Nakkutilliisoqarfik akuliuttariaqalerpoq, kommunimilu aqutsineq qulaajagassallu qulaajaqqissaarlugit.
Kommune Qeqertalimmi iluarsisassat nassuerutigissallugit sunaana annernartoq?
Kommune Qeqertalimmi innuttaaqataasorpassuit Borgmesterimiit qujasarneqartarnertik tusarluartaarutaannarnillu kusassaasoqarniartarnera naammagiunnaarpaat.
Qasigiannguani utoqqarnik sullissinerup naammaginannginnera pillugu akerliussutsimik takutitsisoqaqqammerpoq. Qasigiannguani utoqqaat illuani qulaajaasoqarnissaa nalunaarusiortoqarnissaalu pillugit Siumumit piumasaqarsimavugut. Qulaajaasimanerup inernera nalunaarusiarlu kommunalbestyrelsimut saqqummiunneqassasut Siumumit kissaatigigaluarparput. Qasigiannguani utoqqaat illuani pissutsit pillugit nalunaarusiortoqarsimasoq ilisimatinneqarpugut, nalunaarusiarli kommunalbestyrelsimut saqqummiunneqarsinnaanngitsoq ilisimatinneqarluta. Qanorililluni kommunalbestyrelsimi ilaasortaasoqarsinnaava paasissutissanik pissarsiarerusutatsinnik isertuunneqartutullusooq illuta?
Nalunaarusiaq ataasiakkaanut tunngassutilimmik imaqarsimappat kommunalbestyrelsip matoqqasumik ataatsimiinnissaanut saqqummiunnissaa periarfissaasinnaavoq.
Naggataatigut Qasigiannguani utoqqaat illuani pissutsit pillugit Kommuninik Nakkutilliisoqarfik akuliuttariaqalertoq kaammattuutigerusupparput.