Danskit naalakkersuisuisa spiralilersuisimaneq pillugu nassuiaateqarnissaat Høegh-Damip piumasaraa. Politikeri isumaqarpoq, Inuiaat Inuit eqqorniarlugit inuiannik toqoraasoqarsimasoq, toqqortortoqarnanilu kusassaasoqassanngilluinnartoq naqissuserpaa
Kalaallit Nunaanni inuusartut ikilisarneqarnissaat Danmarkip 1960-ikkunni 70-ikkunnilu sulissuteqarsimanerat DR nutaarsiassiivoq. Kalaallit Nunaanni innuttaassusikkut ineriartorneq killilersimatinniarlugu Nunarput pillugu ministeriaqarfik danskit nakorsaannut piumasaqarsimavoq, kalaallit arnartai tusintilikkaat spiralilersorneqassasut.
– Danmarki pitsaasumik nunasiaateqartuunini saqqummersinniartarpaa, taamatulli oqariartuuteqartarneq eqqunngitsumik takutitsiniarneruvoq, DR-imi 21 Søndag takoreerlugu Siumup Folketingimi ilaasortaatitaa, Aki-Matilda Høegh-Dam oqarpoq.
– Inunngorsimasussarpassuugaluit eqqarsaatigalugit takusara nakeriallaatigeqaara. Taamaaliortoqarsimanngitsuuppat qassimmita Nunatsinni inunngorsimassagaluarpat, Aki-Matilda Høegh-Dam aperivoq.
Inuiaat Inuit eqqorniarlugit inuiannik toqoraasoqarsimanerarpaa:
– Inatsit tunngaviusoq 1953-mi allanngortinneqarmat Kalaallit Nunaanni inerisaasoqarnissaa aalajangiunneqarpoq. Inerisaanerli akisussasoq paasineqarmat inuiannik toqoraasoqarnissaa danskit naalagaaffiata aalajangerpaa, Siumut tunuliaqutaralugu politikeri oqarpoq. Takusani nakeriallaatigereerlugit naqqiisoqarnissaa kissaatigaa, imalu oqarpoq:
– Pisimasoq amiilaarnarpoq, toqqortortoqarnanilu kusassaasoqassanngilluinnarpoq. Allatut oqartoqarsinnaanngilaq: Nunatsinni inuiannik toqoraasoqarnikuuvoq, Siumut tunuliaqutaralugu Folketingimi ilaasortaq tikkuaavoq.
1966-imit 1970 tikillugu danskit naalagaaffiat kalaallit arnartaannut 4.500-nut spiralilersuisoqarsimanera TV-kkut takusassiarineqarpoq.
Danskit naalakkersuisuisa spiralilersuisimaneq pillugu nassuiaateqarnissaat Høegh-Damip ullumi piumasaraa.