Ulluni makkunani Qasigiannguani covid-19-imik suli tuniluuttoqarpoq. Taamaakkaluartorli Qasigiannguani piffissami matumani nakorsaqannginnera ilungersunarpoq akuerineqarsinnaananilu. Taamaattumik Qasigiannguani piffissami matumani nakorsaqannginnera pillugu Peqqinnissamut Naalakkersuisoq Kirsten L. Fencker (N) piaartumik iliuuseqartariaqarpoq
All.: Aqqa Samuelsen, Kommune Qeqertalimmi kommunalbestyrelsemi Siumut gruppiani siulittaasoq
Qasigiannguani covid-19-imik tuniluuttoqarnera Qasigiannguarmiut uippakajaaratik eqqissisimasumillu pisumut qisuariarnerat pitsaavoq. Qasigiannguani inuiaqatigiittut immitsinnut ikioqatigiillaqqinnerput tassuunakkut takuteqqipparput, pisumullu ilungersunartumik aqqusaagaqarnitsinni immitsinnut ikioqatigiillutalu tapersersoqatigiittuaratta. Qasigiannguani innuttaasut tassuunakkut naammagittarlutik maligassiuilluarmata nersualaagassarujussuupput.
Peqqinnissaqarfeqarnerulli tungaatigut massakkut atukkat naammagittarfissaajunnaarput. Covid-19-imik tuniluuttoqarnerata kinguneranik Qasigiannguani peqqissaavimmut saaffiginnissutit pinartuunngitsut unitsinneqarnikuupput. Taassuma saniatigut Qasigiannguani piffissami matumani nakorsaqannginnera innuttaasut apeqquserlugulu paasisinnaanngilaat. Covid-19-imik tuniluuttoqarnerata nalaani Qasigiannguani nakorsaqannginnera innuttaasut ilaasa toqqissisimassutiginngikkaat paasilluarneqarsinnaavoq.
Covid-19-imik tuniluuttoqarnerata kinguneranik pissutsit ajornerulissagaluarpata peqqinnissaqarfeqarnerup tungaatigut Qasigiannguani innuttaasut toqqissisimananngitsumik atugassaqartinneqarsinnaanngillat. Taamaammat Peqqinnissamut Naalakkersuisoq Kirsten L. Fencker (N) Qasigiannguani piffissami matumani nakorsaqannginnera pillugu iliuuseqartariaqarpoq, ajornerusumillu pisoqannginnerani piaartumik Qasigiannguani nakorsaqaqqilernissaa qulakkeerneqarluni.