Covid-19-imut paasissutissat kingulliit eqqarsaatigalugit Qasigiannguani innuttaasut minnerpaamik 53-it covid-19-imik tunillatsissimasut nunatsinni Nakorsaaneqarfimmiit uppernarsarneqarpoq. Taamaammat Qasigiannguani innuttaaqatigiiulluta tamatta mianersortariaqarpugut.
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Qasigiannguani covid-19-imik tuniluunnerup siammapiloorsinnaanera pinaveersaarniarlugu pisortat innersuussutaat maleqqissaarneqassasut kaammattuutigerusupparput.
Juulleriartornerani ilaqutariinnut innuttaasunullu aaqqissuunneqartartut ataatsimoorfiusut peqataaffiginngikkallarnissaat piffissami matumani isumatusaarnerussaaq.
Qasigiannguani innuttaasut pisarnermisut innuttaaqatigiittut akisussaaqatigiinneq, ikioqatigiinneq, qanillinaveersaaraluarlunilu ataatsimoorussaqarneq anersaaralugu kaammattoqatigiittariaqarpugut. Innuttaaqatigiilluta covid-19-imik tunillanneqarsimasut ilaqutariit meerartallit utoqqaallu immikkut ikorfartorneqarnissamik pisariaqartitsilersinnaasut ikioqatigiinnitsigut tapersersoqatigiinnitsigullu eqqumaffigilluaritigit, ikiortariaqalerpatalu maleruaqqusat atuuttut iluanni ikioqatigiinnissarput kaammattoqatigiinnissarpullu pinngitsoorneqarsinnaanani.
Innuttaaqatigiiulluta toqqissisimaqatigiinnissarput uippallinnginnissarpullu pisariaqarpoq. Innuttaasut covid-19-imik ersiutillit ersiuteqanngikkaluartullu misissortinnissaannik kaammattorusuppagut, paasisaqajaarluni pitsaanerpaajummat toqqissisimanarnerullunilu.
Qasigiannguani immitsinnut paaraluta mianersorlutalu pisoq nalaatarput imaannaanngitsoq qaangerniarlugu tuniluunnerup siammarneqannginnissaa pingaartillugu immitsinnut qanillinaveersaarnissamik kaammattuerusuppugut.
Qasigiannguani innuttaasut covid-19-imik nalaataqartut tamanik ajunnginnerpaamik qaangiilluarnissaannik Siumut gruppianiit kissaappagut.