-– Inatsisartut avaqqullugit sulineq massakkorluinnaq unitsinneqassasoq kissaatigaarput
Naalakkersuisooqatigiit inuussutissarsiorfiusinnaasunik periarfissaarutsitsiniarnerat, Parisimi isumaqatigiissummut nunatta ilanngutitinneqarneratigut suli sakkortuninngortinneqassaaq
All.: Vivian Motzfeldt aamma Jess Svane, Inatsisartunut ilaasortat
Glasgowimi nunarsuarmi mingutsitsinaveersaarnissaq pillugu ataatsimiinnissami, COP26-mi, Naalakkersuisut siulittaasuata oqariartuutigaa, nunatta Parisimi isumaqatigiissummut ilanngutitinneqarnissaminut piareertoq. Taamatullumi pisoqarpoq.
Naalakkersuisut inatsisartunik ingiallorteqaratik sulinerat sakkortunerpaamik uparuarparput, aaliangikkat nunatsinnut pingaarutilerujussuit innuttaasunik taakkulu qinigaannik peqataatitsinani ingerlanneqarnerat annertuumik ernumassuteqarnissatsinnut pissutissaqalersitsipput.
Naalakkersuisut siulittaasuat apererusupparput piginnaatitsissut suna pigalugu nunatta aaliangikkamut taamak annertutigisumut kisermaassilluni iliuuseqarnera sumik peqquteqarnersoq.
Parisimi isumaqatigiissummut nunarput pissutissaqavissumik peqataasinnaannani 2016-mi oqariartorpoq, taamani tunngavilersuutigineqarluni nunarsuup immikkoortuani allaanerusunik atugassaqarluni ineriartornissamut periarfissaqartoqartariaqartoq, Parisimilu 2015-imi isumaqatigiissutigineqarsimasumi tamanna periarfissaqarluartitsinngitsoq. Pingaartumik aatsitassarsiornissaq eqqarsaatigalugu ineriartortitsisinnaaneq annertuumik akornusersorneqartussaasoq oqariartuutigineqarpoq.
Tunngavilersuutit tamakku ullumikkut allanngorsimanngillat. Ineriartornitsinni aningaasarsiorsinnaassutsikkullu siuarsaaniarnitsinni suli immikkut inissisimanissarput pisariaqartipparput, nunat ineriartorfioreersimasut assiginagit allaanerusumik atugassaqarnissatsinnik pisariaqartitsigatta.
Taamaattumik sakkortuumik Naalakkersuisunut kaammattussavagut, inuiaqatigiit isumasioqqaarsimatinnagit Parisimi isumaqatigiissummut nunatta ilanngutitiinnarneqarnissaa pissanngitsoq.
Nunatta aningaasarsiorfiusinnaasunik nutaanik periarfissaqarnera tupinnaraluartumik piffissami kingullermi annertuumik Naalakkersuisooqatigiinnit innarlerniarneqartarpoq, kingullertigut aatsitassat qinngornernik akoqarsinnaasut sumilluunniit inissisimanerat soqutaatinnagu, assigiimmik periarfissaajunnaarsinniarneqarnerat ilanngullugu.
Taamak sulineq nangillugu Parisimut isumaqatigiissummut nunarput ilanngutitinneqassappat, Siumumit pissutissaqartumik aarleqqutigaarput, aningaasarsiorfiusinnaasutut periarfissaasinnaasut suli amigarnerulernissaat.