Upalungaarsimaneq – Qatserisartoqarneq

Nunatsinni innuttaasut tamarmik toqqissisimasumik inuuneqarnissaat qulakkeerneqassaaq — upalungaarsimanerup qatserisartoqarnerullu pitsaanerulernissaat Siumup anguniarpaa.

Nunatsinni ajunaarnersuarnut upalungaarsimajuarnissarput pisariaqarluinnarpoq.

Timmisartut umiarsuit ajunaarnerini, nunamik ikuallattoornermi, illorsuit ikuallarujussuarnerini, tassaarsuartoqarnermi allatigullu ajunaarnersuarnut periusissat peqqissaartumik suliarineqarsimasassapput. Inuttaasullu peqataatinnissaannut periusissiat innuttaasunut ingerlaavartumik paasissutissiissutigineqartassapput.

Nunat uatsinnut sanilliuttakkavut assigalugit pisoqarfiusuni, soorlu tassaarsuartoqarfiusuni, inuit sumiiffimmi najugallit salliullutik upalungaarsimasussatut aaqqissuussamik piareersimasuutigineqartassapput. Aaqqissuussineq Islandimut Canadamullu assingusoq nunatsinnut eqqunneqassaaq.

Nunatsinni upalungaarsimanikkut periusissiap naleqqussarlugu nutartertuarnissaa Siumup sulissutigiuassavaa. Nunatsinni innuttaasut tamarmik sumiluunniit najugaqarunik toqqissisimallutik inuunerminnik ingerlatsinissaat qularnaarneqarsimassaaq.

Nunatsinni upalungaarsimanermut aqutsisoqarfik nutaamik aaqqissuuteqqinneqassaaq susassaqarfiit tamaasa peqataatillugit. Upalungaarsimanermi akisussaaffilersuinerit pisussaaffilersuinerillu tamarmik ajunngitsumik paasiuminartumillu aalajangersarneqarsimassapput. Upalungaarsimanermi suliaqartut toqqissisimanartumik, akissaatitigullu naleqquttumik suliffeqartutut inissisimanissaat qulakkeerneqassaaq.

Takornariaqarnerup annertusiartornera malillugu umiarsuit takornariartaatit upalungaarsimanikut annaassiniarsinnaanikkullu pitsaasumik sullinneqartuarnissaat ineriartortinneqassaaq.

Innuttaasut qaammarsaaffigineqartuarnissaat imaani nunamilu ajutoornaveersaartitsinermut tunngatillugu ingerlaavartunngortinneqassaaq.

Qatserisartoqarneq
Nunarput tamakkerlugu innuttaasut tamarmik Nunaqarfimminni Illoqarfimminnilu toqqissisimallutik ulluinnarni inuunerminnik ingerlatsinissaat qulakkeersimaniarlugu Nunatsinni qatserisartoqarnerup inatsisitigut ersarissumik tunngaveqartumik aamma qatserisartutut inissisimanerup apeqquserneqarsinnaajunaarlugu aaqqiiviginissaa Siumup sulissutigeqqinniarpaa, taamaattumik;

Nunatsinni qatserisartunut ilinniarfik aamma annaassiniartarnermut ilinniarfik ataatsimoortillugit ingerlanneqarsinnaasunngorlugit pilersinneqassapput. Taamatullu aamma upalungaarsimanermi suliassaqarfiit isumagisassallu ilanngullugit ilinniartitsissutigineqartassapput.

Sinerissami qatserutitigut atortorissaarutit ullutsinnut naleqquttut nunaqarfinni illoqarfinnilu tamani pigineqassapput.

Meeqqat atuarfiini ilinniarfinnilu, aamma piffinni pisariaqartitsiffiusuni ikiueqqaarnermut paasisitsiniaasoqarlunilu ilinniartitsisoqartassaaq, tassami sumiluunniit pisoqarsinnaanera eqqarsaatigalugu sapinngisamik innuttaasut amerlanerpaat ikiueqqaarnermut minnerpaamik ilisimasaqartariaqarput.

Suliffeqarfinni pisortani pigineqartuni tamani, uummammut aallartitsissutit pigineqassasut Siumut isumaqarpoq.

Qatserisartut atugaat pitsanngorsaavigineqassapput, akissarsiaat ilanngullugit.