Inuit innarluutillit

Inuit innarluutillit pisinnaatitaaffii qulakkeerneqassapput — tamarmik inuiaqatigiinni naligiimmik pineqarlutik periarfissaqartinneqassapput.

Siumup inuit innarluutillit pisinnaatitaaffiisa qulakkeerneqarnissaat pingaartippaa. Tamanna eqqarsaatigalugu Inuit Innarluutillit Oqaaseqartartuat pilersinneqarpoq, inatsillu innarluutillit pillugit nutarterneqarlutik.

Innarluutillit, ersinngitsunik ersarissunilluunniit, pisariaqartitaannut naleqqussakkamik sullinneqarnissaat sulissutigineqassaaq – najukkami atugaasut tunngavigalugit ikiorsiissutit pitsanngorsaavigineqarlutik.

Tarnikkut timikkullu innarluutilinnut najugaqarfiit naleqqussarneqassapput, sulisoqarnerlu pitsaasumik ingerlanissamut qulakkeersimaneqassaaq

Innarluutilinnut periarfissat ineriartorteqqinneqassapput – suliffimmi piginnaasat tunngavigalugit suliffeqarfinnut naleqqussakkanik peqataatitsineq siuarsarneqarluni.

Inissianik, atuarfeqarnermi sullissinermilu atugassanik naleqquttunik ineriartortitsineq pissaaq, Namminersorlutik Oqartussat kommunillu suleqatigiinnerisigut.

Inissiat tulluartut amerlanerulersinneqassapput, angerlarsimaffimmi najugaqarsinnaanngitsunut najugaqarfiulersinneqarlutik.

Meeqqanut innarluutilinnut angajoqqaat tapersersorneqassapput, soorlu tikeraarnissamut aaqqissuussinerit, oqaloqatigiinnermut attaveqarnerillu ataavartumik ingerlanneqassallutik.

Meeqqerivinni sulisut innarluutinut pikkorissarnissamut periarfissinneqassapput, meeqqat immikkut pisariaqartitaannik paasinninnerulernissaat anguniarlugu.

Tarnikkut timikkullu innarluutilinnik sullissisut pikkorissarneqartassapput, ilinniarsimasut amerlanerulernissaat sulissutigineratigut aamma siusissukkut iliuuseqartarnissaq aqqutissiuuteqqullugu.

Ersinngitsunik innarluutilinnut paasinninnerulernissamik paasititsiniaasoqassaaq, sullinneqarnermilu pitsanngorsaasoqarluni. Ulloq unnuarlu paaqqinnittarfinnut inissinneqarsimasunut angajoqqaat ukiut tamaasa tikeraarsinnaalernissaat suliarineqassaaq.

Innarluutilinnut – meeqqerivinni, atuarfinni, najugaqarfinni inuiaqatigiillu iluani – periarfissat tamanut atuuttut pilersinneqassapput – qanigisat suleqatigalugit.