Inuit innarluutillit pisinnaatitaaffii illersorlugit sulinerup ingerlanneqarnissaa qulakkeerumallugu Inuit innarluutillit oqaaseqartartuat Siumup siuttuuffigisaanik pilersinneqarpoq, Inuillu innarluutillit pillugit inatsit nutarterneqartuarluni.
Nunatsinni timikkut ersinngitsumillu innarluutillit ikiorserneqartarfiisa isumagineqartarnerisalu pitsanngorsarneqartuarnissaat qulakkeersimaniarlugu naleqqussarneqartassapput. Angerlarsimaffimmi pisariaqartitat aallaavigalugit pisortanit ikiorsiisarnissaq pitsaanerpaamik naleqqussarneqassaaq. Taamatullu nunatsinni inunnut innarluutilinnut najugaqarfiit pisariaqartitsinermut naapertuuttut sulisoqarnikkullu naleqqussaaffiusut sapinngisamik pitsaanerpaamik ingerlanneqassapput.
Innarluuteqarnermi pisinnaasat sulisinnaassuserlu aallaavigalugit, suliffinnut naleqquttunut sulisumut suliffeqarfimmullu iluaqutaasumik, periarfissaqartitsilernissamik naleqqussaasoqassaaq.
Angajoqqaat illoqarfigisami avataani paaqqutarineqartumik inummik innarluutilimmik qitornaqartut ukiumut ataasiaq akiliunneqarlutik qitornaminnik tikeraarsinnaatitaalernissaat kommunerujussuit peqatigalugit suliarineqartariaqarpoq.
Inuiaqatigiit avatangiisillu piareersarneqassapput inuit innarluutillit akuusinnaanngortillugit, soorlu qamutinik assakaasulinnik atuisut suliffeqarfinnut, pisortat kommunillu allaffeqarfiinut, aningaaserivinnut allanullu isersinnaanissaat inatsisitigut piumasaqaatigineqartoq.
Inuit innarluutillit tarnimikkullu nappaatillit isumagineqarnerat pitsaanerpaaq angujumallugu sullissinissamik ilinniagallit amerlisarneqassapput ullumikkullu sulisorineqartut pikkorissartuarnissaminnut periarfissaqartinneqartassallutik.
Timikkut tarnikkullu innarluutillit inissaqarnertigut, atuarfeqarnertigut, sulisoqarnertigullu piorsaaffigineqassapput, pisariaqartitaallu naapertuuttumik Namminersorlutik Oqartussanit Kommunerujussuarnillu aningaasalersorneqarlutik.
Nunatsinni tarnikkut nappaatillit isumagineqarnerat pitsanngorsarneqartuassaaq atornerluisunullu katsorsaasarneq piorsarneqartuassalluni.
Timikkut innarluutillit inissaqartinniarnerat piorsarneqassaaq, ininik naleqquttunik sanasoqarneratigut, nammineersinnaanngitsullu eqqarsaatigalugit najugaqarfinnik pilersitsiortornikkut.
Inunnik innarluutilinnik meerallit pitsaanerusumik kiffartuunneqassapput. Inunnut innarluutilinnut sullissisut ataasiakkaat aalajangersimasumik inunnik innarluutilinnik sullissisutut sungiussisimalluartut amerlisarnissaat sulissutigineqassaaq. Inuit innarluutillit illoqarfimmut allamut inissinneqarsimasut pisariinnerusumik sullinneqartarnissaat aamma pisariaqarpoq. Inuit innarluutillit ajunnginnerusumik atugaqassappata pisariaqarpoq angajoqaat attavigilluarneqartarnissaat. Inuit innarluutillit ilaquttaminnut tikeraartinneqartarnerat aaqqissuussaanerusumik tamanullu naammaginartumik ingerlanneqartariaqarpoq.
Timikkut tarnikkullu innarluutilinnik sullissisut ataavartumik pikkorissartinneqartarnissaat pisariaqarpoq.
Ersinngitsumik innarluutillit paasineqajaarnerusalernissaannut iliuusissat pilersinneqassapput, sullinneqartarnerisalu pitsanngorsarnissaat Siumup sulissutigissavaa. Angajoqqaat ersinngitsumik innarluutilinnik meerallit ulluinnarni oqilisaaffigineqartarnissaasa aqqutissiuunneqarnissaa nalilersorneqassaaq.
Meeqqerivinni sulisut innarluutit pillugit pikkorissarnissaat pillugu periarfissiisoqassaaq siusinnerusukkut sullissineq anguniarlugu.
Inunnut innarluutilinnut angajoqqaat immikkut ittumik sulinerup tungaatigut oqilisaaffigineqartarnissaasa aqqutissiuunneqarnissaa anguniarneqassaaq.