Isumaginninneq

Atugarissaarneq inuiaqatigiinni tunngaviuvoq — ikiorneqarnissamillu pisariaqartitsisut tamarmik ikiorneqassapput.

Inuiaqatigiit ineriartoqqinnissaannut siuariartornissaannullu atugarissaarneq tunngaviussaaq. Inuiaqatigiit atugarissaarnikkut nukittuumik inissisimasut ilaqutariit tunngavissaraat ikiorneqarnissamillu pisariaqartitsisut ikiorneqarnissaat qulakkeerneqarsimassaaq.

Siumut tunngaviusumik isumaqarpoq nunatsinni innuttaasoq kinaluunniit peqqissoq imminut napatinnissaminut killilerneqanngitsoq pisussaaffeqartorlu. Nunatsinni inuk kinaluunniit atugarisami pitsanngorsartuarnissaanut akisussaaqataavoq. Isumaginninnermut ikiorsiissutit sulinerup akilersinnaanerujuarnissaanik qulakkeerinnittumik annertussusilerneqarsimassapput.

Siumut isumaqarpoq inunnik isumaginninnikkut sullissinerit ikiorsiisarnerillu tamarmik, naatsorsueriaatsit naleqassutsimik aallaaveqartut sakkugalugit, ingerlaavartumik nalilersorneqartariaqartut naleqqussartuarneqarlutillu. Taamaaliornikkut nunatsinni sullinneqartunut tamanut sullissineq pitsaanerpaaq naligiinnerusorlu anguneqassaaq, tamannalu ineriartortinneqassaaq Namminersorlutik Oqartussat kommunillu suleqatigiinnerisigut. Isumaginninnikkut sullissineq imminut ikiornissamik aallaaveqartillugu ingerlanneqartassaaq.

Suliagut tamarmik meeqqanik ilaqutariinnillu ingerlallualersitsinissamik siunertaqarput:

• Inunnik sullissisut ilisimasaasa atorluarneqarnerunissaat siunertaassaaq.
• Ilaqutariit siusinaartumik ikiorserneqartarnissaat anguniarneqassaaq.
• Angajoqqaarsianngortitsisarneq nukittorsarneqassaaq, ulloq unnuarlu paaqqinnittarfinnut tunniussisarneq annikillisarneqarluni. Ilaqutariit iluani angajoqqaarsianngortitsisinnaaneq ataqatigiittumik aaqqissorneqarnissaa anguniarneqassaaq. 
• Angajoqqaarsianut tapiissutit naleqquttumik inissinneqarnissaat anguniarneqassaaq.  
• Kommunit akornanni assigiimmik inatsisit tunngavigalugit sulisoqassaaq, tamannalu anguniarlugu ataqatigiissaarisussamik pisariaqartitsisoqarnerata iliuuseqarfigineqarnissaa Siumup sulissutigissavaa.
• Tarnikkut napparsimasut saaffiginninnerminni ikorfartorneqarnissaat pimoorullugu siuarsarneqassaaq.
• Tarnimikkut innarluutillit periutsit allat atorlugit ikiorsersinnaanissaat sutigut tamatigut anguniarneqassaaq. 
• Atuarfeqarfinni inunnik isumaginninnermi siunnersortinik kommunini tamani pilersitsinissaq qulakkeerneqassaaq.
• Inunnik isumaginninneq assannik amerlasuunik pisariaqartitsivoq siunissarlu ungasinnerusoq eqqarsaatigalugu utoqqaat amerliartortussaapput, taamaattumik siunissami sulisussat isumannaarnissaat aqqutissiuunneqassaaq.
• Inunnik isumaginninnerup iluani pisinnaatitaaffiit, soorlu angajoqqaat innarluutilimmik meerallit pisinnaatitaaffii, erseqqarissumik paasinartumillu susassaqarfinni saaffiginnittarfinnilu takuneqarsinnaaneri aqqutissiuunneqassapput, Innarluutillit oqaaseqartartuat peqatigalugu.
• Angerlarsimaffeqarnissaq pisinnaatitaaffiuvoq, taamaattumillu najugassaqanngitsut najugassaqaqqilernissamik tungaanut unnuiffissaqarsinnaanissaat inummut pisinnaatitaaffiussaaq.