Ilisimatusarluni ilinniartitaaneq

Ilisimatusarneq annertusarneqassaaq – inuiaqatigiinnut, inuussutissarsiutinut kulturitsinnullu iluaqutaasumik.

Siunissami inuiaqatigiit atugarissaartut ilinniarluarsimasunik nutaaliullaqqittunillu innuttallit pilersinneqarnissaat qulakkiissagutsigu ilisimasat nutaat annertunerusullu pisariaqarput. Taamaattumik Siumut ilisimatusarluni ilinniartitaanerit eqqarsaatigalugit annertunerusumik iliuuseqarniarpoq.

Nunatta pisariaqartitai sulisoqarnermilu pisariaqartitat aallaavigalugit siunissami ilisimatusarneq ineriartortinneqartariaqartoq Siumut isumaqarpoq. Tamatumani nunatsinni aningaasarsiornikkut tunngavigisagut aallaavigalugit, suliassaqarfinni tamani qanoq iliornikkut inuiaqatigiinnut pissarsissutaanerpaamik aaqqissuussisinnaanerit pillugit ilisimatusarnerit immikkut annertusarneqarnissaat sulissutigineqassaaq.

Ilisimatusarneq inuussutissarsiornerup iluani nukittunerulersitsissaaq, aningaasatigut kulturikkullu aaqqiiniarnermi aqqutissiuissagami inuiaqatigiinnilu inerisaanermik annertunermik pilersitsissagami.

Ilisimatusarfinni allanilu ilisimatusarnermik suliaqarfiusuni naammattunik ilinniartitsisoqassaaq, ilisimatusarneq orniginartuusariaqarmat pitsaasunillu atugassaqarfiulluni.

Nunatsinni ilisimatusarnermi paasisat inernerillu katersorneqassapput. Nunanit allanit nunatsinnut ilisimatusarnermik ingerlataqartut pinngitsooratik kalaallinik suleqateqartarnissaat ilisimatusaqateqartarnissaallu aqqutissiuunneqassaaq.

Nunatsinni issittoq, avatangiisit pinngortitarlu pillugit ilisimatusarfeqalernissaa Siumup sulissutigaa.

Aalisakkat sammillugit qaffasinnerusumik ilinniarsinnaaneq aallartinneqassaaq, pitsaassuseq, naleqarnerulersitsineq assigisaallu ilinniagassatut neqeroorutigineqarlutik.