Mala Høy Kuko
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqquteqaatit:
- Kuummiuni tunitsivik pillugu naalakkersuisut qanoq iliuuseqarniarpat?
- Aalisartut akiligassaminnik malinnaasinnaajunnaartussat naalakkersuisunit qanoq iliuuseqarfiginiarneqarpat?
- Fabrikki tunitsivituaq tunumi piginnittuninngaaniit matuneqassappat naalakkersuisut qanoq iliuuseqarnissaminnik pilersaaruteqarpat?
- Angallammmik tunitsivigineqarsinnaasumik tunumiisitsinissamik Naalakkersuisut pilersaaruteqarpat?
- Angallat tunitsivigineqartussaq tikisinneqassappat aalisakkat ullormut qassi tonsi minnerpaamik angallammut tunineqartassappat?
(Inatsisartuni ilaasortaq Mala Høy Kúko, Siumut)
Tunngavilersuut:
Qaammat iluitsunngorpoq kuummiuni tunitsivituaq matummalli. Taamanikkut ajarnartorsiutaasoq sarfamut atortuutit ilaatajortut paasineqareernikuuvoq. Massakkullu qangalili aaqqiisoqareerneratigut ammarneqaqqissinnaagaluarluni tassa tunioraaneq aalisakkanik ingerlanneqaqqissinnaagaluarpoq. Kisiannili ammarneqaqqinngilaq paasisat Naalakkersuisut piginnittullu akunnerminni aaqqiissutiginiagaat aaqqinneqaqqinngimmat.
Ammarneqaqqinngippat tunutsivik kingunerisussaavaa aalisartut aallartittuarnikuugaluit kiisalu aamma angallatiminni motoorinillu amuaavinnillu assigisaanullu akiligassallit kiisalu aamma illuminnut qullinullu sorpassuarnillu akiligassallit akiliisinnaajunnaarlutit kommunimut ikioqqussummik saaffiginnissuteqarnissaat. Arlallit qulliminni qamitaajumaarput, illuminni anisitaanissaminnik allagarsiumaarput, meerartallit kaalerumaarput. Ila sorpassuarnut akissaarullutik piniartut aalisartullu nunamiiginnalerumaarput.
Ullut suliffiusut qulit ingerlaneranni akineqarnissara naatsorsuutigaara.
—
Naalakkersuisut akissutaat uani atuarsinnaavat (pdf).