Anguniakkat

Pisuussutit uumassusillit

Siumut 2766 Views

Siumut sulinermini siunertaqarpoq, pisuussutit uumassusillit piujuartitsinermik tunngaveqartumik aqunneqassasut. Aqutsinermi ilisimatusarneq, atuisut ilisimasaat aamma innuttaasut peqataatinnerat qulakkeerneqassapput, kinguaariit tullii nangittumik iluaquteqarsinnaaqqullugit.

Pisuussutit uumassusillit piujuaannartitsineq tunngavigalugu aqunneqassapput, kinguaariinnut tulliuttunut iluaqutaanissaat qulakkeerniarlugu. Pinngortitaq pisuussutillu uumassusillit illersorneqassapput, aamma silaannaap allanngoriartornerata pisuussutinut sunniutai pillugit ilisimatusarneq ingerlaavartumik ingerlanneqartassaaq.

Atuisut ilisimasai aamma ilisimatuussutsikkut paasisat pisassiisarnermi oqimaaqatigiissinneqassapput. Atuisut ilisimasaannik atuinissamut periusissanik suliaqartoqassaaq.

Tamakkiisumik atorluaaneq pissusissamisoortoq angujartorneqassaaq. Pisuussutit ullumikkut atorluarneqanngitsut tamakkiisumik atorneqalernissaat siunertaralugu pilersaarusiortoqassaaq.

Aalisartunut piniartunullu tunngasunik aalajangiinerni ilisimasat tamakkiissut atorlugit sulisoqartassaaq, kattuffiillu attuumassutillit isumasioqatigineqartassapput. Siumup anguniarpaa innuttaasut, aalisartut piniartullu ilisimasaasa katersuiffigineqarnissaat suleqatigiissutigineqassasoq.

Pisuussutinik atuinermi innuttaasut paasinninnerat annertusarneqassaaq, Pinngortitaleriffik allallu susassaqartut suleqatigalugu.

Pisuussutit uumassusillit tamarmik inuiaqatigiit ataatsimut pigisaraat. Pisortat ingerlatsinerminni qulakkiissavaat, pisuussutinik atuineq illersorneqarsinnaasumik ileqqorissaartumillu pissasoq.

Pinngortitaleriffiup aningaasatigut nukittorsarneqarnissaa pisariaqarpoq – atuisunik, nunanik allanik ilisimatusarnikkullu suleqateqarneq annertusaqqullugu.

Nunat sanilitta imartatsinni pisuussutitsinnik atuinerat isumaqatigiissutit aqqutigalugit naligiimmik ingerlanneqassaaq, qulakkeerneqassaarlu pisuussutit sapinngisamik amerlanerpaat kalaallit iluaqutigissagaat.

Pisuussutit uumassusillit peqqissusaat ingerlaavartumik misissorneqartassapput, inuiaqatigiinni nerisassatigut nappaateqalersinnaasunik pinaveersaartitsiniarluni.