Avataasiorlutik suliffeqarfiit ilaat eqqarsarpoq, pisassaminnik ikilileriffigineqalaassagunik tamanna sinerissap qanittuani aalisartunut akeqartinniarlugu. Pisortaasa ilaat oqariartorpoq, 1. januar 2025 aallarnerfigalugu sinerissap qanittuani aalisartut aningaasat attartukkatik akilissagaat taamaaliunngippatalu angallataat arsaarinnissutigineqassasut. Polar Seafoodip sioorasaarineratut inissittoqassappat uagut partiittut piaartumik qisuariassagatta neriorsuutigissavarput.
All.: Karl Tobiassen, Inatsisartuni gruppip siulittaasua aamma Doris J. Jensen, politikikkut oqaaseqartartoq
Aalisarneq pillugu Inatsisissatut siunnersuut pillugu oqallinneq nuannersoq ingerlavoq, taamaakkaluartorli aamma eqqunngitsorpassuarnik tunngavilersuiniartoqarlunilu allaat sioorasaarinernik ingerlatsisoqartoq Siumup maluginiarpaa.
Inuiaqatigiinni oqallinneq peqqinnartoq annerusumik oqaaseqarfiginngikkaluarlugu akuersaarneqarsinnaanngilluinnartumik sioorasaarisoqarnera uani tikikkusupparput.
Aalisarnermut Inatsisissatut siunnersuut tunngaviusumik siunertaqarpoq, inuiaqatigiit pisuussutaasa oqimaaqatigiittumik atortussanngortinneqarnissaat aamma sinerissap qanittuani aalisartut kiffaanngissuseqalernissaat. Qulakkeerniarneqarpoq nunami suliffissuarnut pituttorneqaratik namminneq niuerfissarsiorsinnaanngornissaat aamma naleqarnerulersitsiniarsinnaanngornissaat. Allatut oqaatigalugu, qanga KGH-p aaqqissuussisimanera, kingornalu uagut nammineq inuiaqatigiittut nangissimasatta, atorunnaarsikkiartuaarneqarnissaa Siumup tunngavisseeqataaffigerusuppaa.
Sioorasaarineq ajorluinnartoq
Allannguiartulernissamut ilaapput avataasiorlutik ingerlatserusuttut allat periarfissinneqarnissaat aamma pisuussutit qanorluunniit inuiaqatigiit Kalaallit pigigaat.
Avataasiorluni aalisarneq, annermik kilisaassuit atorlugit ingerlatsiffiusoq, amerlanerusunit peqataaffigineqalissappat, pisassat allatut agguaaneqartarnissaat aamma qummut killilerneqarnissaat pisariaqassaaq.
Taannalu tunngavilersuutigalugu avataasiorlutik suliffeqarfiit ilaat eqqarsarpoq, pisassaminnik ikilileriffigineqalaassagunik tamanna sinerissap qanittuani aalisartunut akeqartinniarlugu. Sinerissap qanittuani aalisartunik, pingaartumik umiatsiaararsortunik pituttuisimanini, Polar Seafoodip kingullertigut uppernarsartarpaa. Suliffeqarfik taannaqqissaaq januaarimi Sermitsiaq.AG-mi allaaserineqarpoq oqariartortoq, toqqaannanngikkaluamik pisassaqartarneq unitsinneqassanngitsoq.
Allatut oqaatigalugu sinerissap qanittuani aalisartut pisassaat toqqaannanngikkaluamik Polar Seafoodimit piginnittuuffigineri ingerlaannassasoq. Tunngavilersuutigaat aalisartut 200-nit amerlanerusut akiitsoqartikkamikkit taakku pisassaasa Polar Seafoodimut tunisarnissaanik aalisartut piumasaqarfigineqartartut. Aalisartullu angallataat qularnaveeqqutitut atortarsimagamikkit, taakkununnga IOK eqqunneqassappat akiitsui ingerlaannaq akileqquneqassasut. Ilutigisaanik oqariartuutigaat “erniaqartitsisaratik”, naak aalisartut pisaasa akikinnerulersinneranik periuseqartut ilimanaraluartoq.
Nunatsinni naqisimanninneq atorneqassanngilaq
Ukioq manna apriilip 25-ani inuit oqaloqatigiittarfianni suliffeqarfiup oqariartuutini sakkortusivaa. Pisortaasa ilaat oqariartorpoq, 1. januar 2025 aallarnerfigalugu sinerissap qanittuani aalisartut attartukkatik akilissagaat taamaaliunngippatalu angallataat arsaarinnissutigineqassasut. Suliffeqarfiunngooq piginnittui ikaarsaariarneq ukiunik qulinik sivisussuseqartussatut inatsisissami siunnersuutaasoq utaqqinagu, erngertumik pissusiulersussanut nalimmassarniarput.
Siumup naatsorsuutigaa, sinerissap qanittuani aalisartunut bankit aningaasaliinissaminnut nalornissuteqarlutik maannamut atukkiiumanngittarnerisa kingunerisaanik, aalisartut allatut aaqqiissuteqarsimassagunik tamanna isumaqatigiissuteqarnikkut pisimassasoq.
Isumaqatigiissuteqartarnermut inatsit malinneqarsimassappat, erseqqissumik allassimassaaq suna isumaqatigiissutaanersoq, allannguisinnaanermut periarfissat aamma atorunnaarsitsinermi piumasaqaatit ilanngullugit. Isumaqatigiissut atuutsinneqarsinnaanngilaq pinngitsaaliinertut, sanngiinnerusumik atornerluinertut, sianiinaarinertut imaluunniit paasinerluinikkut atuutsinneqalersimappat. Isumaqatigiissuteqarnermut inatsisip siunertaraa, qanorluunniit illuatungeriit imminnut naatsorsuutigeqatigiillutik aamma toqqammavileeqatigiillutik naatsorsuuteqaqatigiissasut.
Polar Seafoodillu maannamut oqariartuutigisartagaanni maluginiarnarpoq, isumaqatigiissutit pineqartut annermik illuatungaannaanut iluaqutaanerullutik inissisimasut, aamma isumaqatigiissutip qanoq atorunnaarsinneqartarnissaa annertuumik ersernerluppaluttartoq.
Naalakkersuisut piareersartariaqarput
Suliffeqarfik inuiaqatigiittut pisuussutivut atorlugit ingerlatsinissamut akuersissuteqarfigineqarsimasoq, aalisartunut allanut taamak sioorasaarilluni pissusilersulernera ernumanarlunilu akuersaarneqarsinnaanngilluinnarpoq. Assinganik ernumanarpoq, aalisarnermut inatsisissami kiffaanngissusermik peqarlutik ingerlaqqinnissaanut periarfissiissuteqarfiginiakkat, massakkumut pissusiusimasut tunngavigalugit suliffeqarfimmit allamit pigisaminnik inuussutissarsiutiminnillu arsaartuiffigineqalissappata.
Taamaattumik Siumut isumaqarpoq, Naalakkersuisut iliuuseqarnissamut piareersimasariaqartut. Sakkut suut atorneqarsinnaaneri uani annermik tikissanngilagut, kisianni erseqqissumik oqariartuutigalugulu neriorsuutigissavarput, Polar Seafoodip sioorasaarineratut inissittoqassappat Siumut piaartumik qisuariartariaqalissammat.