Ullutsinni ilisimalikkavut imaanaanngillat, pingaartumik Naalagaaffiup iliuuserisartagarisimasaanut tunngasut. Uagullu nammineq akisussaaffigisimasavut utaqqinata tamakkiisumik tigussagivut isumaqarpunga. Maannamut inuit 14-it pineqartut ilisimavagut.
All.: Doris J. Jensen, politikikkut oqaaseqartartoq
Arnarpassuit, ilaatigut suliluunniit inersimasutut pisinnaatitaaffeqalersimanngitsut, ilisimanngisaanik naartunaveersaasersorlugit Naalagaaffiup ingerlatsisimanera ilisimaligarput akuersaarneqarsinnaanngilluinnartoq siusinnerusukkut Siumup siulittaasuata sakkortuumik oqaasertalerlugu oqariartuutiginikuuaa. Ilaatigut Naalagaaffiup akisussaaffimmik tamakkiisumik tigusilluni pineqartunut taarsiissuteqarnissaa oqariartuutigalugu.
Kingullertigut ilanngullugu ilisimalerparput, peqqinnissaqarfiup 1992-imi uagut akisussaaffigilerneraniit naartunaveersaasersuilluni ingerlatsisoqarsimasoq. Tamanna Nakorsaaneqarfiup avammut ilisimatitsissutigalugu uppernarsarpaa. Maannamut inuit 14-it pineqartut ilisimavagut.
Uagut akisussaaffigisatsinnik taamak pisoqarsimanera soorunami akuerineqarsinnaanngilaq. Isumaqarpungalu utaqqeqqittoqassanngitsoq. Pineqartut tamarmik siullermik pisortatigoortumik utoqqatserfigineqassasut isumaqarpunga, aamma tamatuma malitsigisaanik taarsiivigineqarnissaat pinngitsoorneqarsinnaanngitsutut isigaara.
Siunissami uagut inuiaqatigiittut akisussaaffigisatsinnik naartunaveersaasersorneqarsimasut allat ilisimaneqaleraangata, ingerlaannaq utoqqatserfigineqarlutillu taarsiivigisarnissaat ingerlanneqartassasortaaq isumaqarpunga.
Minnerusumik pisinnaanngilagut. Pisimasoq akuerineqarsinnaanngilluinnarmat, inuiannillu nungusaaniarnertut paasineqartariaqarmat. 1992-p kingorna uagut nammineq tassunga peqataasimanerput ilanngulluni kanngunartuliaavoq tamatta inuiaqatigiittut attassinnaanngisarput.