Utoqqaat sivisuumik sulisimanermikkut inuiaqatigiinnut naleqarluinnartumik iliuuseqarsimapput tamannalu iluarusuuteqarfiginerusariaqarparput. Taakku tunngavisseeqataasimapput ullumikkut inuiaqatigiit pilersinniarlugit, taamaattumik utoqqaat inuunerisa ataqqinartumik toqqissisimasumillu ingerlariaqqinnissaat qulakkiissallugu pisussaaffigaarput. Siumut siuttuulluni alloriarnerit siulliit pingaarutillit aallartippai – pilersuinissamut pisussaaffik atorunnaarsipparput aamma soraarnerussutisiat tunngavia nangitassatsitut qaffapparput. Suliassavut suli naammassinngillat.
All.: Ane Zeeb Pjettursson, Siumut sinnerlugu Inatsisartunut qinigassanngortittoq
Piujuartussamik pitsanngorsaaneq nukittorsaanerlu ingerlateqqittariaqarparput, utoqqarnut iluaqutaasussanik suliniutit atuuttut iluarsaattarlugit. Ilumoorfiusunik sivisuumillu atuuttussanik aaqqiissutissanik pisariaqartitsivugut. Taamaattumik Siumup utoqqarnut aningaasaqarniarnikkut atugassarititaasut qulakkeerneqarnissaat pillugu suliaq ingerlateqqissavaa, taamaalilluni sivisuumik sulisimanermik kingorna aningaasaqarnikkut nalorninartorsiortinneqannginniassammata.
Utoqqarnut aningaasaqarnikkut naapertuilluarneq
Maannakkut utoqqaat aningaasatigut unammilligassaqarput, taakkulu inuunerminni tamarmiusumik sullarisimanerannut naleqqutinngillat. Tunngaviusumik soraarnerussutisiaqarnermut akileraarusersuineq naapertuilluartumik aaqqiissussaanngilaq, aamma inuiaqatigiinnik pilersitseqataasimapput annertuumik. Taamaattumik Siumut tunngaviusumik soraarnerussutisiaqarnermut akileraaruserinermut annikilliliinissaq aamma atorunnaarsitsinissaq sulissutigissavaa.
Ilumoorsinnaanngilaq utoqqaat nunatsinni ernumassutigisariaqaraat qanoq ilillutik pisariaqartitatik akilersinnaassanerlugit. Soraarnerussutisiaqarnermi isumannaatsumik aalajangersimasumillu qaffaanissaq qulakkeerumavarput, taamaalilluni utoqqaat aningaasatigut akiligassaannut naammattumik aningaasassaqartillugit aammalu inuuneq ataqqinartumik ingerlassinnaajumallugu periarfissaqaqqullugit aaqqiiviginiarneqaqqissapput. Utoqqaat inuiaqatigiinni piitsuusutut inuuneqartussaanngillat!
Utoqqarnut inissiatigut isumannaallisaaneq
Aningaasaqarnikkut toqqissisimaneq kisimi naammanngilaq. Utoqqaat isumannaatsunik naleqquttunillu najugaqarnissaat qulakkeertariaqarparput. Tamanna ajornaatsuinnaanngilaq, tassami nammineq pigiliutaminnik illuuteqanngitsut inissianik pitsaanerpaanngitsunik najugaqarnermikkut atugarliortitaasarput aamma. Taamaattumik Siumut sulissutigissavaa utoqqaat akilerneqarsinnaasunik, tikikkuminartunik naleqquttunillu najugaqarnissamut periarfissaqarnissaat.
Qinersiviup tulliani suliassatsitut isigaarput Nunarput ima aaqqissuuneqarsimassasoq, utoqqaat ataqqinartumik inuunissamut periarfissaqassasut, aningaasatigut nalorninartorsiussanngitsut aamma najugaqarnerat utoqqarnit ernummatigineqassanngitsoq.
Peqatigiilluta utoqqarnut siunissaq pitsaanerusoq qulakkiissavarput. Suliarlu ilungersuullugu suliareqqinnissaanut piareersimavunga.