Ukiup qiianarsinerani Kuummiuni utoqqaat pisinnaanerusut angerlarsimaffianni tummeqqat ulorianaqisut pissutaallutik utoqqarmik ammukarniaraluartumik siorna niuminik napisoqarpoq. Tummeqqat ulorianaqisut utoqqarnullu naleqqutinngilluinnartut ukiuni arlalinni aaqqissuuneqarsimanngillat. Akerlianik aqqutikkut allakkut tummeraliorsimapput utoqqaap ataatsip ineqarfiata nalaatigut.
All.: Laura Táunâjik Uitsatikitseq
Pisoq alianaqaaq utoqqaq niuminik napinermini aallaruttariaqarsimammat. Tamanna pillugu kommunimut arlaleriartumik anngussisoqartarsimasoq takussutissaqarpoq, aaqqiiniarnerilli takussutissartaqanngitsut kisiat pisimapput, sulili tummeqqat ulorianarsiartortut takuneqarsinnaavoq. Suna pillugu aaqqiiniartoqannginnera paasiuminaappoq. Aamma suliassaq taamak annertutiginngikkaluarpoq.
Maanna ukiariartulerpoq suli aaqqiiniarneq iluamik pisimanani. Tamanna assut kipiluttunarpoq akuersaaruminaalluinnarporlu. Saaffiginnittaqattaarnerit pisimapput, sullissinerli iluamik ingerlasimanngilaq. Taannaannaanngilarli, tunitsivimmiit aqqut uloriarluinnartoq saaffiginnissutigineqartarsimasoq allaallumi ataatsimiititaliamut susassaqartumut anngunneqartarsimasoq maannamut suli nikisinneqarsimanngilaq.
Ajuissumik ajutoortoqarnissaanut ernumanaateqarluinnarpoq, tamannalu pinissaa kissaatiginanngilluinnaraluaqaaq. Apeqqutaaginnarpasilerporli qaqugu ajutoorneq pissanersoq, taamaattoqassappallu akisussaaffik kommunimut tunniunneqarnissaa qularnanngilluinnarpoq.
Inoqarfiit mikinerusut aamma naleqassuseqartinneqartariaqarput, maani aamma inuit inooqataammata.