Nunatsinni angallanneq ajoraluartumik pitsaanngilaq – innuttaasut allaat qaammatini utaqqisariaqartartut tusartarpavut. Kiffartuussinissamik isumaqatigiissutit nalilersoqqinneqartariaqalerput, ingerlatsisullu pisussaaffimminnik naammassinninnerat qulakkeerneqartariaqarpoq. Pitsaanerusumik aaqqissuussinissaq politikikkut aqqutissiuunneqarnissaa aallartittariaqarpoq.
All.: Sakio Fleischer, Siumumi siulersuisuunernut ilaasortaq
Piffissanngorpoq nunatsinni angallannerup qanoq aaqqissuunneqarsimanera eqqarsaatigeqqissallugu aamma kiffartuussinissamut isumaqatigiissutit nalilersoqqissallugit. Najugaqarfiit akornanni aqquserngit nunatsinni piunngimmata, taamaallaat imaq silaannarlu atorlugit nikinnissatsinnut periarfissaqarpugut. Taamaattumik nunatsinni qanoq inissisimanerput eqqarsaatigalugu, aningaasarpassuit atorlugit sumiiffiit akornanni attaveqaatit pitsaasut qulakkeerniarlugit politikikkut qulakkeeriniartoqarsimavoq.
Ukiut ingerlaneranni isigaarput angallannermi aaqqissuussinerit annertuumik ajorsiartortut. Angalasut ilaat sivisoorsuarmik utaqqisariaqartarput, ilami qaammat tikillugu, tamannalu akuersaaruminaappoq. Silap pissusia allanngorarneralu apeqqutaaqataasut qularnanngilaq, kisianni aamma pisariaqarpoq paasiniassallugu, kiffartuussinissamik isumaqatigiissuteqarfigineqarsimasut teknikikkut ingerlatsinermikkullu isumaqatigiissutit naapertorlugit naammaginartumik kiffartuussinersut.
Suliaqartut suliassaminnik naammassinnissinnaajunnaarsimappata, taava politikikkut aalajangiinissarput pisariaqarpoq isumaqatigiissutillu ammaqqinneqartariaqarlutik. Innuttaasunut pisussaaffigaarput qulakkiissallugu, angallannikkut pitsaanerpaamik aaqqissuussisimanissarput – pingaartumik attavilersuutitigut periarfissatuavut eqqartorneqartillugit.
Taamaattumik kaammattuutigissavara Attaveqaasersuutinut Naalakkersuisoq piaartumik kiffartuussinissamik isumaqatigiissuteqarfigisatsinnik oqaloqateqaqqullugu, taamaalilluni attaveqarnerup qaffasissumik nalimmassarneqarnissaa qulakkeerniarlugu aammalu sullissinissamik isumaqatigiissutinut naapertuuttumik sullissinissamut piumassuseq annertuneruleqqullugu.
Tamatuma saniatigut allatut aaqqissuussinissamik erseqqissunillu pisariaqartitsisoqarpoq, taamaalilluni isumaqatigiissutip tunngavigisai naammassineqarsimatinnagit, tamannalu silap pissusaanik tunngaveqarsimanngippat, taarsiissuteqartarnissaq pisinnaalersillugu.